Jas.kz

Алматы облысында 6 мың басқа арналған мал бордақылау алаңы іске қосылды, деп хабарлайды ҚазАқпарат.

Кербұлақ ауданында орналасқан Шадиев шаруа қожалығы «қазақтың ақ бас сиырын», «алатау» мен «ангус» тұқымын өсіруді қолға алды.

Басты мақсат — Елбасының 100 нақты қадамында көрсетілген ет экспорты әлеуетін арттыру тапсырмасын орындау. Шаруашылық бірден жоспарланған қуатына шықты. 6 мың бас ірі қара байлауда тұр. Ал 400-ден астам «қара ангус» сиырын Австралиядан әкелді. Қыстың қамын жаз ойлаған қожалық мал азығын молынан дайындады.

Шаруашылықтың іс бақарусышы Жандос Атағожаевтың айтуынша, 35 мың орам шөп, 10 мың тонна жүгері, 5 мың тонна арпа, 2 мың тонна бидай бастырылған. Демек биылғы қыстан қиналмай шығуға қор жеткілікті. Кәсіпорын Алматы қаласындағы ет комбинаттарына жылына 1200 тонна өнім өткізуді жоспарлап отыр. Шаруашылық етті экспортқа шығаруға да дайын. Ал, ауданда орналасқан ет өңдеу комбинаты малды барлық талапқа сай етіп сойып жөнелтуге мүмкіндік береді.

Жалпы Алматы облысында ірілі-ұсақты 60 мал бордақылау алаңы бар. Жыл басынан бері 6 мың тоннадан астам сиыр еті өндірілді.

ҚР халық әртісі, әнші, сазгер Дәнеш Рақышевтың 90 жылдығына арналған еске алу кеші өтті. Дауылпаз тұлғаның туған жері Панфилов ауданында «Жетісудың бұлбұлы, сөз өнерінің дүлділі» атты шара алдымен ескерткіш басына гүл шоқтарын қоюдан басталды деп.

Тәуелсіздіктің 25 жылдығымен тұспа-тұс келген мерейтойға жиналған жұрт желтоқсан қаһармандарын да еске алды.

Азаттық жолында құрбан болған Ләззат Асанова мен Ербол Сыпатаевтың ескерткішіне гүл шоқтарын қойып, рухына тағзым етті. Бұдан кейін қонақтар Дәнеш Рақышевтың өмірі мен шығармашылығына арналған көрмені тамашалады. Онда Берік Әбілханов есімді азамат әншіге арналған мемориалдық кешеннің жоқтығын ескеріп, арнайы жоба әзірлегендігін айтты. Оны аудандық өнер мектебінің алдына қойса деген ұсынысын білдірді.

Торқалы тойда Жаркенттегі орталық көшені Дәнеш есімімен алмастыру керектігі көтерілді. Сонда ауданның қос бәйтерегі Әбілхан Қастеев пен Дәнеш Рақышевтың атымен аталатын көшелер түйісіп, қонақтарды құшақ жая қарсы алғандай әсер қалдырады,- деді жазушы Бексұлтан Нұржекеев.

Ұлы тұлғаны ұлықтау шарасында қонақтарды аудан әкімі Бердәулет Абдулдаев құттықтап, «Дәнеш бір туар дара тұлға» атты баяндама жасады. Ал облыстық мәдениет, мұрағаттар және құжаттама басқармасының басшысы Ақан Әбдуәлиев облыс әкімінің ыстық ықыласын жеткізді. Өңірде Дәнеш атамыздың торқалы тойына орай өткізілген шараларды тізбектеп берді. Соған ұйытқы болған Нұржан Жанпейісовпен Гүлнәр Дәнешқызына алғыс хаттарын табыс етті.

ҚазАқпарат

Тұңғыш Президент күніне орай Іле ауданы Казцик ауылында өндірістік аймақта орналасқан «Айсберг -Алматы» логистикалық кешені ашылды. Аталған шараға облыс әкімінің орынбасары Серік Тұрдалиев арнайы келіп қатысты, деп хабарлайды ҚазАқпарат.

Еліміздегі сауда-сатықтың өркендеуіне тың серпін беретін жобаға кәсіпкер тарапынан игерілген қаржы да қомақты. 2014 жылдан бері нысанды салу мен жабдықтауға жұмсалған жалпы иевестиция көлемі 2 жарым миллиардтан асады. Ең маңыздысы азықтық өнімдерді -15 пен -25 градус аралығындағы темпратурада сақтай алады. Жаңаша үлгідегі қойманың сиымдылығы 120 мың текше метр. Мұндай ірі көлемді логистика облысымызда тұңғыш рет ашылып отыр,- дейді мамандар.

«Бұл кәсіпорынның көлемі өте үлкен тоңазытқыштары бар. Мұндай технология Алматы облысында жоқ. Бұл бірінші жоба болып есептеледі. Сонымен қатар Алматы қаласының іргесінде орналасқандықтан алып қаланы азық-түлікпен қамтамассыз етуде аса қажетті жоба болып есептеледі»,- дейді аудандық кәсіпкерлік бөлімінің басшысы Данияр Қоңырбаев.

Мұнда 130 адам тұрақты жұмысқа орналасты. Оларға бар жағдай жасалған. Жалпы, бұл кешен алып шаһардың іргесінде орналасқандықтан сапалы қызмет көрсете алады. Тіпті салқындатылған қоймаларды жалға беру жағы да қарастырылған. Сонымен қатар вагондарды ұсыну, отандық тоңазытқышта сақтау жұмыстарын да өз құзырларына алған.

Алматы облысындағы жалпы білім беретін мектептерде қазан айынан бастап тәрбие жұмысын ұйымдастыруға жәрдемдесетін және соған тікелей атсалысатын «Адал ұрпақ» ерікті мектеп клубтары құрылды. Басты көздейтіні – жас ұрпақты азаматтыққа, отансүйгіштікке, адамның құқықтарына, бостандықтарына және міндеттеріне құрметпен, еңбексүйгіштікке, оқуға, еңбекке, өмірге жасампаздықпен қарауға, олардың бойында сыбайлас жемқорлыққа төзбеу мәдениетін қалыптастыруға тәрбиелеу.

Бүгінгі таңда облыс мектептерінде аталған клубты ұйымдастыру мәселелері мектептерде жан-жақты талқыланып, ҚР Мемлекеттік қызмет істері және сыбайлас жемқорлыққа қарсы іс-қимыл Агенттігінің Алматы облысы бойынша департаменті мен облыстық білім басқармасының бірлескен ауқымды жоспары бекітілген.

«Адал ұрпақ» сыбайлас жемқорлыққа қарсы білім; сыбайлас жемқорлыққа қарсы ақпарат және шығармашылық; мәдени-көпшілік іс-шаралар секілді секциялардың басын біріктіреді. Осы жекелеген секциялардың аясында жеткіншектер арасында түрлі дәрістер оқылады, «дөңгелек үстелдер» және басқа да ағартушылық, мәдени іс-шаралар ұйымдастырылады.

— Алматы облысы бойынша 741 мектептің 320-да «Адал ұрпақ» ерікті мектеп клубтары және 530 кітапханада «Парасатты азамат» бұрыштары ұйымдастырылды. Оқушылар қоғамдағы өз орнын, ойларын бейнероликтер, суреттер, шығармалар, флэш-мобтар арқылы білдіре алады, — дейді Алматы облыстық білім басқармасы басшысының орынбасары Гүлсара Исағұлова өңірлік коммуникациялар қызметінде өткен брифингте.

Алматы облысының өңірлік коммуникациялар қызметі

Қаратал ауданында сүт-тауарлы ферма ашылды.

«Тастөбе АгроФуд» ЖШС кешені — Тәуелсіздіктің 25 жылдығына арнап ашылған маңызды нысандардың бірі. Салтанатты ашылу рәсіміне кәсіпкер, Олимпиада чемпионы Жақсылық Үшкемпіров, облыс әкімінің орынбасары Серікжан Бескемпіров, аудан әкімі Қайрат Бисембаев арнайы қатысты.

Нысан иесі Сәбит Ахметовтің айтуынша, 2015 жылы 90 бас ірі қара әкелсе, биылғы жылы тағы 120 бас сатып алған. Енді мал басын 1500-ге жеткізуді жоспарлап отыр. Ірі қараның барлығы да симментал тұқымы.

Кәсіпкердің сөзіне сүйенсек, бүгінгі күні швейцариялық сиырлар тәулігіне 1,5 тоннаға дейін сүт береді. Жоспарда оны 8 тоннаға дейін жеткізу көзделген. Сауылған сүт түгелімен сүт өнімдерін шығаратын «Үштөбе Айдын» ЖШС-ға жіберіледі. Соның нәтижесінде сүт өндірісінің аудандағы көшбасшысы өнім түрін көбейтіп, сапасын арттыруға мүмкіндік алды.

— Сүт кешенін ашу – ауданымыз үшін айтулы оқиға. Кешен малдың жоғары өнімділігімен, малды баптауға жасалған қолайлы жағдайымен, жаңа технологияны енгізуімен ерекшеленеді. Бүгінгі күні фермада 50 адам жұмыс істейді. Шаруашылық иесі кейін іргесін кеңейтіп, жұмысшылар санын 100-ге жеткізуді де жоспарлап отыр. Өткен жылы нысанның құрылысы басталғаннан бері біздің аудандық филиал заңдық тұрғыдағы мәселелерге қатысты жан-жақты көмек көрсетті, — деді Кәсіпкерлер палатасының Қаратал аудандық филиалының директоры Марат Құсайынов.

Жалпы, жыл басынан бері Қарасай ауданында 750 басқа арналған жоғары өнімділікті сүт-тауарлы ферма және «Медеу Коммерц» ЖШС-ның прогрессивті технология негізінде қуаттылығы жылына 5 мың тонна болатын сүт өңдеу цехы іске қосылған.