Jas.kz

Түркістанда жастар арасында қазақ күресінен республикалық дәстүрлі «Тайқазан» жүлдесін сарапқа салған жарыс мәресіне жетті, деп хабарлайды қала әкімдігінің баспасөз қызметі.

Аталған дүбірлі додаға еліміздің барлық өңірлерінен келген 156 балуан қатысып, бақтарын сынады. Жалпы командалық есепте Жамбыл облысының жампоздарына тең келер балуандар табылмады.

Турнирдің жеңіл салмағы болып саналған 55 келіде жамбылдық Н.Аманшүкіров қарсылас шақ келтірмеді. Ол ақтық сында оңтүстікқазақстандық Т.Тұрмаханбеттен басым түсті. Ал үшінші жүлделерді алматылық М.Жамбыл мен жамбылдық Ә.Сағаділда өзара бөлісті.

Алпыс келіде ақтық айқасқа алқынып шыққан Жамбыл облысының қос балуаны Б.Жармұхамбетов пен О.Керимов арасындағы белдесуде Б.Жармұхамбетовтің бағы жанды. Үшінші орындарға жамбылдық Д.Тұрғанғали мен Солтүстік Қазақстаннан келген Р.Алпысов жайғасты. Қарағандылық Р.Ховдрасол (66 келі) өз салмағында жеңімпаз атанса, оқтүстікқазақстандық балуан Х.Олжаға екінші орын бұйырды. Үздік үштікті М.Рахимов (СҚО) пен Т.Молдаш (Түркістан) қорытындылады.

74 келіде жерлестерінің үкілеген үміті түркістандық Е.Қожан турнир кестесінің ең биік сатысынан көрінді. Екінші орынды С.Жақсыкелді (ОҚО) еншілесе,үшінші орындарға Ш.Сапарханов (ОҚО) пен А.Бескемпір (Жамбыл облысы) лайық деп танылды. 82 келідегі бас жүлде қарағандылық Е.Молдағұловтың қанжығасында кетсе, алматылық Е.Жанатаев екінші орын алды. Үшінші орындар А.Алиходжаев (Түркістан) пен М.Байжігітте (ОҚО) қалды.

Жарыс ауыр салмаққа жақындаған сайын тіпті қыза түсті. 90 келіде Оңтүстік Қазақстан балуаны Н.Есенгелді Қытайдан келген балуан С.Жайдарды қапыда қалдырып жеңімпаз атанды. Үшінші жүлделерді Д.Жамалхан (Түркістан) мен Д.Дариялов (Қызылорда) алды. 100 келі салмақтағы сайыс та жарыс жанкүйерлерін бей-жай қалдырмады. Қ.Шамшиддинов (ОҚО) пен Г.Оңалбай (Алматы қаласы) арасындағы ақтық белдесу Қ.Шамшиддиновтің пайдасына шешілді. Түркістандық қос балуан М.Үсен мен А.Ізбасар үшінші орындарды қанағат тұтты.

Аса ауыр салмақта жамбылдықтар А.Ақберді мен Н.Жұмахан финалда жолықты. Бұл белдесуде А.Ақбердінің мерейі үстем болды. Қарағандылық А.Хапез бен Алматы облысының балуаны М.Насибуллаев елдеріне үшінші жүлделермен оралатын болды.

Қазақ күресі дегенде Түйе балуанды айта алмай өте алмаймыз. «Күш атасын танымайды» деген халық нақылы да осы бәсекеде айқындала түседі. Салмаққа қарамай сынға түсетін бұл тартысты белдесулерде Оңтүстік Қазақстан балуаны Қ.Шамшиддиновтің жауырыны жер иіскемей Түйе балуан атанып,турнирдің арнайы белбеуін тақты. Екінші жүлде де оңтүстікқазақстандық Н.Есенгелді еншісінде. Ал үшінші тұғырларға М.Байжігіт (ОҚО) пен А.Әділбай (Алматы облысы) көтерілді.

Түркістанда мәреге жеткен бұл айтулы додада Қытай мемлекетінде қазақ күресінің жанашыры болып жүрген Дәулетхан Нұрлан бауырымыздың өз шәкіртін алып келіп, жарыс көркін қыздырғанын да айтқан абзал. Сонымен қатар жарыста жеңімпаз бен жүлдегер атанған барлық балуандар арнайы сыйлықтармен марапатталды.

Түлкібас ауданындағы  индустриалды аймақта жалпы құны  3 млрд. 709 млн. теңге болатын 6 жоба жүзеге асырылады. Құрылысы осы айда басталатын зауыттар іске қосылған кезде жаңадан 284 жұмыс орындары  ашылатын болады.

Жобалардың негізгі бағыты ауданның табиғи ерекшелігін ескере отырып, тамақ өнімдерін өндіру. Яғни,  жеміс-жидек көкөністерді өңдеп, табиғи шырын шығару және ет өнімдерінен шұжық тағы басқа өнімдер шығарылатын болады.

Аудан басшысы Ә.Тұрғымбеков аталған жобаларды жүзеге асырушы кәсіпкерлермен кездесіп, келісім шартқа қол қойды.

Кездесуде кәсіпорындарға қажетті  шикізатпен қамтамасыз ету үшін ауданда  бау бақшалар, мал шаруашылығы саласында  кооперативтер құрылатыны айтылды. Сонымен қатар, аудан әкімі алдағы уақытта индустриалды аймақта тағы да 9 жоба іске асатынын мәлімдеді.

Жалпы жер көлемі 50 гектарды құрайтын индустриалды аймақтың инфрақұрылым жұмыстары өткен жылы толық аяқталған.

Кеше Оңтүстік Қазақстан облысының әкімі Жансейіт Түймебаев суретшілерді қолдау, өнерін насихаттау, пікір алмасу, сондай-ақ, осы бағытты дамыту мақсатындағы ұсыныстарды талқылау мақсатында облыстық бейнелеу өнері музейінде болды, деп жазады ОҚО әкімінің баспасөз қызметі. Онда аймақ басшысы суретшілер одағының мүшелерімен кездесіп, саладағы өзекті мәселелерді талқылады. Сонымен қатар, жиынға ҚР еңбек сіңірген өнер қайраткері, Ресей, Қырғызстан Көркемөнер академиясының академигі, Мемлекеттік сыйлықтың иегері Ерболат Төлепбай қатысты.

Отырыс барысында Қазақстан Суретшілер Одағы облыстық филиалының директоры Нұрлан Шилібаев өнер адамдарының әлеуметтік жағдайын жасау мәселесін көтеріп, шығармашылықпен айналысатын жұмыс орнының жоқтығына алаңдаушылық білдірді. Сондай-ақ, жергілікті суретшілердің туындыларын аталған бейнелеу өнері музейінің қорына сатып алу жайын қозғап, түрлі тақырыпта жоспардан тыс жылына екі рет көрме ұйымдастыруды сұрады. Филиал директоры өз баяндамасында облыс суретшілерінің шығармаларын халықаралық деңгейге көтеруды ұсынып, суретшілер шеберханасын құру қажеттігіне тоқталды.

Мұнан соң,  ҚР еңбек сіңірген өнер қайраткері Ерболат Төлепбай сөз сөйлеп, саладағы өзге де өзекті жайттар бойынша ойын білдірсе, суретші, қолөнер шебері Кендебай Қарабдалов өзі тап болған кедергілер ретін аймақ басшысының алдына көлденең қойды.

Осынау проблемаларға қанық болған аймақ басшысы нарықтық экономика заманында әрбір азамат күні-түні жұмыс істеп, еліміздің көркеюіне атсалысу қажеттігіне назар аударды. Шығармашылық өкілдерінің жұмысын тек жергілікті деңгейде ғана емес, халықаралық дәрежеде көрме ұйымдастыру арқылы өткізу керектігін айтқан әкім облыста заманауи талаптарға сай жаңадан Оңтүстік Қазақстан облысының көркемсурет галереясының салынатынын жеткізді.

«Оңтүстік Қазақстан облысының көркемсурет галереясын салу туралы тапсырма бердім. Өйткені, сурет күтімді талап етеді. Маманданған жаңа ғимарат салынған соң, күн тәртібіндегі мәселелер өз ретімен шешімін табады деп ойлаймын. Сондай-ақ, мұнда шеберлік сабақтарын ұйымдастырып, симпозиум өткізу жайын қарастыратын боламыз», — деді Ж.Түймебаев.

Айта кету керек, 2009 жылы суретшілерге қолдау көрсету, олардың шығармашылығын насихаттау мақсатында ашылған Көркемсурет галереясының жанынан 2015 жылы жаңа заманауи тұрғыда қосымша ғимарат салынып, нысан өз алдына «Бейнелеу өнері музейі» мемлекеттік коммуналдық қазыналық кәсіпорны ретінде қайта құрылған болатын. Бүгінгі таңда, мұндағы шығармашылық туындыларының жалпы қоры 1015 дананы құрайды.

Өңірімізде Қазақстан Суретшілер одағының 88 мүшесі бар болса, оның 2-уі ҚР еңбек сіңірген қайраткері, 1-уі ҚР Мемлекеттік сыйлығының лауреаты, 15-і «Мәдениет қайраткері» төсбелгісінің иегері.

Бүгін Оңтүстік Қазақстан облысының әкімі Жансейіт Түймебаев Қазығұрт ауданындағы «Жасыл желек» мемлекеттік мекемесінің жұмысымен танысып, тұқымбақтағы  көшеттерді аралап көрді, деп жазады ОҚО әкімінің баспасөз қызметі.

Үш учаскелік бөліктен тұратын 60 гектар тәлімбақта бүгінде 3,5 млн. түптен астам ағаш көшеттері бапталуда. Осындағы жұмыстардың жайын баяндаған облыстық Табиғи ресурстар және табиғат пайдалануды реттеу басқармасының басшысы М.Отаршиев тұқымбақта қылқан жапырақты, декоративті, жеміс ағаштары мен бұталардың 40-тан астам түрі егілгенін жеткізді. Сондай-ақ, ол тұқымбақтағы өсіріліп жатқан сеппе және тікпе көшеттерге тұрақты түрде күтіп, баптау жұмыстары жүргізілетінін және  сұранысқа ие көшеттердің түрлерімен толықтырылып отыратынын айтты. Мәселен, биыл мекеме тұқымбағында 912 мың түп өскін жаңадан отырғызылған.

Басқарма басшысын мұқият тыңдаған облыс әкімі осындағы  қылқан жапырақты және декоративті ағаштардың биіктігі 2,5 метрден асатын сұрыптарын Шымкент қаласының орталығындағы 26 көшеге отырғызуды тапсырды.

«Өздеріңіз білесіздер, халқы көп  Шымкент қаласында тиісінше, автокөліктердің  саны да тығыз. Сондықтан экологияны сақтап, табиғи балансты реттеу үшін Шымкентті жасыл қалаға айналдырып, атына лайықты етуіміз керек. Шаһардың көркіне сән беретін түрлі декоративті ағаштардың санын көбейту үшін осы тұқымбаққа жаңа көшеттерді егу керек. Шымкенттің көгалдандыру жұмыстарына тиісті сала мамандары бірауыздан жұмылдыруды жүктеймін»,-деді әкім.

Шымкенттің көгалдандыру жұмыстарына ерекше мән берген аймақ басшысы бұл мәселені жеке бақылауына алатынын ескертіп, алдағы уақытта қалада бірнеше шағын бақтар (скверлер) салынатынын жеткізді.

Басқарма басшысының айтуынша, «Жасыл желек» тұқымбағынан қалада отырғызуға сай келетін шамамен 100 мың ағаш көшетін алуға болады.

Мекеме құрылған 11 жылда тұқымбақтың егіндік бөлімшелерінде 3-4 млн. дана аралығында қылқан жапырақты, декоративті, жеміс ағаштары мен бұталардың 40-тан аса түрі өсіріліп, облыстағы мемлекеттік  мекемелер мен халықтың сұранысын қанағаттандырған.

Осы күні облыс әкімі Шарапхана ауылдық округіндегі «Нұрлы жол» бағдарламасы бойынша салынып жатқан М.Өтемісұлы атындағы 300 орындық мектептің құрылысымен танысты. Келер жылға өтпелі нысанның сапасын қадағалаған аймақ басшысы құрылыс жұмыстарын мерзімінде аяқтап, онда қолданылатын құрылыс заттары отандық болуын айтты.

Оңтүстік Қазақстан облысы, Ордабасы ауданында ел Тәуелсіздігінің 25 жылдығы аясында ардагерлер кеңесі мен әжелер алқасының ұйымдастыруымен «Әже — ұлт ұйытқысы» байқауы өтті, деп хабарлайды ОҚО әкімінің баспасөз қызметі.

Бұған дейін ауданның бірнеше аймағында әжелер арасында сайыс өтіп, аталған ақтық сынға өз аймақтарынан үздік шыққан жеті әже қатысты. Байқауға қатысушылар ережеге сай, бес кезең бойынша өнерлерін көрсетіп, түрлі сындардан өтті.  Мәселен, олар ұмыт бола бастаған дәстүрлерді сахналап, қазылардың сұрақтарына жауап берді. Шеберліктері мен өнері де сараланды.

Көп жыл білім беру саласында еңбек еткен қажымұқандық Р.Әлсейітова, ұрпақ тәрбиесі бойынша үйретері мол шұбарсулық Т.Бөлекбаева, бесік жырын айтып, ұл-қыз өсірген бөгендік Ш.Қалымбетова, ауыл анасы атанып отырған бөржарлық Н.Үсенова өмірден түйгенін ортаға салды.

Ал домбыраны өмірлік серік еткен қарақұмдық А.Нысан «Еліміздің өркендеп өсуіне, көп біздің қосар әлі үлесіміз», — деп жырласа, 70 жасты желкелеген бадамдық әже Ж.Әбдірахманова «Жас кезден айтқан әнімді, 100 жаста да қоймамын», — деп әуелетті. Сонымен қатар, Шұбар ауыл округі әжелер алқасының төрайымы Р.Ертай «Ау-жар» салтының мәні мен мағынасын айтып, ерте замандағы қалың малдың құрбаны болған қыздардың мұңын әнмен жеткізді.

Аудандық ардагерлер кеңесінің төрағасы Т.Әбдіқайымұлы іс-шараны ұйымдастырушы, аудандық әжелер алқасының төрайымы А.Көкішеваға алғысын жеткізді.

Қатысушылардың барлығына ерекше алғысын білдірген Айгүл Сейітқызы қазақ халқындағы ақсақалдар мен әжелердің тәрбиесінің ұлтты қалыптастырудағы рөліне тоқталды.

Ел Тәуелсіздігінің 25 жылдық мерекесі өңірлерде айтулы шаралармен өтуде. Игі шаралардан Түркістан маңындағы ауылдық округтері де шет қалмауда, деп хабарлайды Түркістан қаласы әкімдігінің баспасөз қызметі.

Ұлттық спорт түрлерін Тәуелсіздік мерекесімен тұспа-тұс өткізу де шара көркін қыздыра түсуде. Осындай үрдіс Жаңа Иқан ауылында көкпар мен бәйгеден өткен ұлттық спорт ойындарымен жалғасты. Аталмыш шара ауыл әкімдігі мен демеушілердің қолдауымен өтті. Дүбірлі тойда көкпар салымында түйеден бастап төрт түліктің бәрі болды. Төрт шақырымдық бәйге де жиылған жұрттың делебесін қоздырумен болды. Жүлдегерлері ақшалай сыйлықтармен марапатталып, ұлттық ойынымызды тамашалауға келген жұртшылыққа арнайы ас та берілді. «Бүгінгі Тәуелсіздіктің 25 жылдық мерекесіне өткізіліп жатқан ұлттық спорттық ойындарымыз ауылдың көркін ажарландырып жіберді. Осындай шаралар тек біздің ауылымызда ғана емес, өзге ауылдарда да жалғасын тапса игі. Даланың иісін сағынған жандарға бұл ойындар өте керемет әсер берді деп ойлаймыз»,-дейді шараға келген ауыл ақсақалдары. Сондай-ақ мерекелік аста Түркістан қаласының бас имамы О.Елеуов ата-баба рухтарына құран бағыштады.