Jas.kz

Оңтүстік Қазақстан облысында 2016-2017 оқу жылына мектептер оқулықпен 100 пайыз қамтамасыз етіліп отыр. Бұл туралы облыстық білім басқармасының мамандары мәлімдеді.

Мамандардың айтуынша,   мемлекеттік бағдарламаға сәйкес 2016 жылы жалпы облыс бойынша қажетті оқулықтар мен оқу-әдістемелік кешендерін сатып алуға және жеткізуге жергілікті бюджеттен барлығы 2,7 млрд. теңге бөлінген. Бөлінген қаржыға мемлекеттік сатып алу тәртібімен биылғы жаңа оқу жылында 1 сыныптардың жаңартылған білім беру мазмұнындағы оқулықтары мен оқу-әдістемелік кешендері (бірінші сыныптың оқулығы 10 дана), 4 сыныптың ағылшын тілі оқулығы, 8 сыныптарға арналған (8 сыныптың оқулығы барлығы 18 дана) оқулықтар мен оқу-әдістемелік кешендері мен 9 сыныптың дінтану оқулықтары алынды.

Қазіргі таңда оқулықтар 100 пайыз тасымалданып, білім беру мекемелерінде таратылу жұмыстары жүргізілуде. Сонымен қатар, 1 қыркүйек күні әрбір бірінші сынып оқушысына Қазақстан Республикасының Президенті Н.Ә.Назарбаевтың атынан «Менің Отаным — Қазақстан» кітабы салтанатты түрде сыйға тапсырылатын болады. Айта кетейік, жаңа оқу жылында облыс бойынша 73699 бала мектеп табалдырығын алғаш аттайтын болады.

Бүгінде 3000 ерікті іріктелді, олардың көбі ЖОО студенттері. Тыңдаушылардың бірінші тобы дау-дамайларды шешу бойынша тренингтен өтті, деп хабарлайды қалалық әкімдіктің баспасөз қызметі. Астаналық еріктілермен бірге елордада супервайзерлер де білім алды, олар өз тәжірибесімен өңірлердегі әріптестерімен бөлісетін болады.

2017 жылға дейін 4500 ерікті дайындықтан өтеді. Көрме аумағында қонақтармен еріп жүретін еріктілер ЭКСПО-қалашығы инфрақұрылымының объектілері мен элементтерінің орналасу орны туралы хабардар етеді, басқалары – келушілерді билеттендіру; жеке заттар жоғалған жағдайда, көмек көрсетуге және іздестіру бюросымен ынтымақтасу; медпунктердің қызметкерлеріне көмек көрсетуге және көрме әріптестері мен демеушілерімен бірге жүруге жауап береді.

Сонымен қатар, еріктілер кешен тұрақтарын бақылайды, көліктің уақытылы ұсынылуын және көрмеге келушілер мен қатысушыларды автобус аялдамаларына жібереді. Ресми делегациялардың мүшелерін қабылдап, олармен еріп жүретін бөлек топ құрылады. Бұқаралық ақпарат құралдарының өкілдеріне баспасөз үшін жауапты көмекшілер көмектеседі.

ЭКСПО-2017 еріктісі болуға ниет білдірушілер expo2017astana.com. сайтында сауалнама толтыра алады.

Қазақстан Республикасының Президенті Нұрсұлтан Назарбаевтың тапсырмасы негізінде, ұлттық және өңірлік брэнд қалыптастыру, оларды жылжыту бойынша және облыс әкімі Бейбіт Атамқұловтың осы бағыттағы тапсырмаларын орындау бойынша әр аудан және қалаларда кездесулер ұйымдастыру жоспарланған.

Республика деңгейінде атқаралып жатқан ауқымды жұмыстарды жүргізу мақсатында облыс көлемінде арнайы сарапшылар бүгін Арыс қаласында болды.

Кездесуге облыс әкімінің кеңесшілері (бренді қалыптастыру бойынша сарапшылар) С.Бүксіков пен Б.Каюпова, қала әкімі С.Ертай, қоғамдық кеңес мүшелері, қоғамдық бірлестіктер, этномәдени орталықтың өкілдері, мекеме және бөлім басшылары қатысты.

Жиынға қатысушылар қаланың брэндін қалыптастыру, оларды ілгері жылжыту бойынша өздерінің ойларымен бөлісіп, ұсыныстар берді, деп хабарлайды Арыс қаласы әкімінің баспасөз қызметі.

Оңтүстік Қазақстан облыстық прокуратурасында «Лайықты ұрпақ тәрбиелейік!» атты жаңа жобаның таныстырылымы өтті. Бұл жоба өңір прокуратурасының бастамасымен қолға алынып отыр.

Облыстық прокуратураның баспасөз қызметінің хабарлауынша, жобаның мақсаты — уәкілетті органдар жұмыстарының тиімділігін арттыру және балалардың қадағалаусыз және қараусыз қалуларын, жасөспірімдердің қылмыс жасауларын төмендету, кәмелет жасқа толмағандар арасындағы  құқықбұзушылықтың алдын алу.

Прокуратура органдары жасөспірімдер арасында орын алатын қылмыс мәселесіне аса көңіл бөледі. Себебі, бұл облысымызда өзекті мәселенің біріне айналған. Бүгінде оңтүстік өңірінде 1 млн. 200 мыңнан аса бала тұрады.  Бұл көрсеткіш республикамыздың барлық балалар санының 20 %  құрайды.

Жасөспірімдер арасындағы қылмыстардың орын алуына жол бермеу мақсатында прокуратура органдарының жанынан құрылған мобильдік топтар қазірден бастап жайсыз отбасылармен, ата-аналарының қарауынсыз қалған, сабаққа бармай, қаңғыбастыққа салынған балалармен жұмыстар жүргізуде.

Ұсақ құқықбұзушылық жасаған жасөспірімді уақтылы тоқтатсақ, келешекте оның ауыр қылмыстар жасайтын қылмыскер болуының алдын аламыз.

Мемлекеттік органдардың мақсаты, тек құқық бұзушылықтардың алдын алу емес, қылмыстардың шығу себептеріне әсер ету арқылы кешендік іс-шаралар жүргізу болып отыр.

Білім беру саласы қызметкерлерінің облыстық тамыз педагогикалық кеңесінде облыс әкімі Бейбіт Атамқұлов үш мұғалімге пәтер кілтін тапсырды, деп жазады ҚазАқпарат.

№66 «Қазығұрт» жалпы орта мектебінің дене шынықтыру мұғалімі Бағлан Баймаханов 3 бөлмелі пәтер, ал №23 мектеп-лицейдің тарих пәні мұғалімі Жанар Мұстафаева мен №55 жалпы орта мектебінің бастауыш сынып мұғалімі Муккарам Тұрғынова 2 бөлмелі пәтердің кілтіне ие болды. Енді олар «Нұрсәт» шағын ауданындағы жаңадан салынған көпқабатты үйдің тұрғындары атанбақ.

Бұл қуанышты сәт бар уақытын сарп етіп, ел ертеңі саналатын ұл-қыздарды тәрбиелеп, аянбай тер төгіп жүрген ұстаздар қауымын  бір серпілтіп тастады.

«Шынымды айтсам, ерекше толқып тұрмын. Мен үшін ерекше есте қалатын тарихи сәт. Ұстаздық атты ұлы жолды таңдағаныма өкінбеймін. Алты жылдан бері сабақ беріп келемін. Барлық мұғалімдер осындай бақытқа кенелсін деп  тілеймін», — дейді Бағлан Баймаханов.

Бұдан бөлек, үздік нәтижеге қол жеткізіп, біліктілігімен көзге түскен ұстаздар Білім және ғылым министрлігінің, облыс әкімінің Алғыс хатымен, Ыбырай Алтынсарин атындағы төсбелгімен марапатталды.

Жеке кәсіпкер Бақытжан Серманизов пен Шардара аудандық дене шынықтыру және спорт бөлімінің ұйымдастыруымен балық ұстаудан Халықаралық турнир өткізілді. Шардара су қоймасының жағалауында өткен балықшылар жарысына Өзбекстан республикасы мен еліміздің Астана, Алматы, Тараз, Қызылорда, Оңтүстік және Солтүстік Қазақстан секілді бірқатар қалалары мен облыстарынан командалар келіп қатысты.

кі күн бойына өткен жарыста қармақпен ең көп балық аулаған командалар жеңімпаз атанды. Төрешілердің шешімімен І орынды Шымкент қаласының «Аспан» командасы иеленсе, ІІ орынды Өзбекстан республикасының командасы, ІІІ орынды Сарыағаш қаласының «Алтын балық» командасы еншіледі. Жеңімпаз командалар арнайы сыйлықтармен марапатталды. Айта кетейік, мұндай балықшылар арасындағы дәстүрлі жарыс бірнеше жылдан бері Шардара теңізінің жағасында ұйымдастырылып келеді.

Бәрін айт та, бірін айт, демалыстың төресі – тұнықтан балық аулау деп санайтын азаматтар балықшылар жарысынан керемет әсер алып қайтысты.