Jas.kz

Тамыздың 27-сі мен 28-і күндері «Арай» саябағында сағат 12-ден кешкі 20-ға дейін Astana food and fashion festival атты тамақ пен сән шарасы өтеді, деп хабарлайды қалалық әкімдіктің баспасөз қызметі. Фестиваль ҚР Конституция күніне орайластырылып отыр. Келушілер ерекше ас мәзіріндегі тағамдардан дәм татып, қаладағы үздік дәмханалар мен мейрамханалардың қызықты ұсыныстарымен танысады. Сонымен қатар, фестиваль қонақтары отандық дизайнерлердің жаңа коллекцияларын, қолдан жасалған өнер туындыларын, аксессуарлар мен қазіргі заманғы қазақстандық суретшілердің арт-жобаларын тамашалайды.

Саябақ аумағы бірнеше аймаққа бөлінеді. Дәстүрлі «Шатыр», «Жерұйық» және «Көк базар» секцияларынан басқа, «Астана ЭКСПО-2017» ҰК» АҚ мейрамханалар мен дәмханаларға, қазақстандық кәсіпкерлер мен ШОБ өкілдеріне ақпараттық-таныстыру секторын ұсынады. Ал Pop Up Shop Astana аймағында дизайнерлік киім, әшекейлер, интерьер заттары мен көркемсурет галереясы жәрмеңкесі ұйымдастырылады.

Елордалық жетекші аспазшылар дұрыс тамақтану бойынша шеберлік сыныптарын, сайыстар өткізіп, дәрістер оқиды.

Айта кетейік, шараға Астана қаласының Recommended by EXPO-2017 серіктестері де қатысады.

Шара барысында бүкіл отбасыға арналған жәрмеңке өткізіліп, кроссфитке арналған ашық алаң жасалады. Балалар батуттарда секіріп, аквагрим, көркемдік пленэрлер, қолөнер студияларына, түрлі ойындарға қатысып, көңіл көтереді. Саябақтағы «Кинотеатр» секторында заманауи фильмдер көрсетіледі, ал «Чиллаут» аймағында қонақтарға ыстық кофе ұсынылады.

Astana food and fashion festival шарасы қазақстандық өнімдерді, брэндтер мен маркаларды дамытуға, отбасылар үшін қауіпсіз демалыс ұйымдастыруға, халықты салауатты өмір салтын ұстануға тартуға, сондай-ақ, қала тұрғындарын аспаздық пен сән әлеміндегі жаңалықтармен таныстыруға бағытталған. Биыл мерекелік шараға 10 мың адам келеді деп күтілуде.

20-21 тамызда жыл сайынғы «Мектепке жол» республикалық акциясы аясында сағат 10-да қала әкімдігінің алдындағы алаңда Астана, Алматы, Қарағанды және Шымкент қалаларының кәсіпкерлері мен тауар өндірушілерінің қатысуымен мектеп жәрмеңкесі өтеді, деп хабарлайды қалалық әкімдіктің баспасөз қызметі.

Елорда тұрғындары мен қонақтарына әдебиеттер, мектеп формасы, спорт киімі мен аяқ киімі, кеңсе заттарының мол ассортименті 10-50 пайыздық жеңілдікпен ұсынылады.

– Өзге өңірлерден келгендер, тұрмысы төмен және көпбалалы отбасылар, ірі сауда орталықтарынан киім-кешек сатып алуға ақшасы жоқ азаматтар жәрмеңкеде өз балаларын мектепке дайындау үшін қажетті заттардың бәрін табады. Онда бірінші қажеттіліктегі тауарларды төмендетілген бағамен алуға болады. Біздің мақсатымыз – бәрін формамен және мектепке қажетті заттармен қамтамасыз ету. Егер бала 1 қыркүйекке дайын болмаса немесе оны мектепке қабылдамаса 55-72-49, 55-68-74, 55-74-67 телефондары бойынша қауырт желіге хабарласуға болады, – дейді Астана қаласының білім басқармасы кәмелетке толмағандардың құқықтарын қорғау бөлімінің басшысы Ләззат Орынбасарова.

Айта кетейік, жәрмеңкеде қоғамдық қабылдау өткізіледі. Қалалық Білім басқармасының заңгерлері мен өкілдері халыққа кеңес береді.

Шара барысында елордалық шығармашылық ұжымдардың қатысуымен концерттік бағдарлама ұйымдастырылады.

Жуырда Талдықорғандағы «Жастар» Спорт кешенінде салық және кеден қызметінің құрылғанына 25 жыл толуына орай салтанатты жиын өтті, деп жазады Алматы облысы әкімдігінің баспасөз қызметі.

Департамент қызметкерлерін осы мерейлі мерекемен облыс әкімінің міндетін атқарушы Лаззат Турлашов пен «Нұр Отан» партиясы Алматы облыстық филиалы төрағасының бірінші орынбасары Ғалиасқар Сарыбаев құттықтады. Олар салық және кеден органдары қызметкерлерінің тындырымды еңбегіне алғыс айта отырып, алдағы жұмыстарына сәттілік тіледі.

– Тәуелсіздік жылдарында біздің облысымыз өз дамуында үлкен жетістіктерге қол жеткізді. Департаменттің құрылымдық бөлімшелерінің берекелі де жүйелі жұмысының арқасында барлық деңгейдегі бюджетке салық және кеден түсімдері қамтамасыз етілді. Осы мерекеде әріптестерімді, сол сияқты салық қызметкерлерін ортақ жетістіктерімізбен құттықтағым келеді, – деді өзінің құттықтау сөзінде Мемлекеттік кірістер департаментінің басшысы Құлмұханбет Исақов.

Салтанатты жиында саланың ардагерлері мен үздік қызметкерлері марапатталды. Ведомствоның елуден астам қызметкеріне Қазақстан Республикасы Қаржы министрлігі Мемлекеттік кірістер комитеті мен облыстық департаменттің құрмет грамоталары мен алғыс хаттары беріліп, төсбелгілері тағылды.

Салтанатты жиынның соңы мини-футболдан жолдастық кездесу ойынымен аяқталды.

Аудандық әкімдіктерде алтын құрсақты аналар «Алтын алқа» және «Күміс алқа» төсбелгілерімен марапатталды. Көп балалы аналар еліміздің демографиясын дамытуға қосқан үлестері үшін құрмет белгілеріне ие болды, деп хабарлайды қалалық әкімдіктің баспасөз қызметі.

«Алматы» ауданы бойынша 13 ана, соның ішінде 11-і күміс, екеуі алтын алқа алды.

– Батыр аналарымызды мақтан етеміз, олар құрметке лайық, өйткені алты және одан артық баланы тәрбиелеп, өсіру – үлкен жауапкершілік және ауыр міндет, – деді «Алматы» ауданы әкімі аппаратының басшысы Ғалымжан Сәметов наградаларды табыстау барысында.

Сарыарқа ауданында 7 батыр ана марапатталды, біреуі алтын, алтауы күміс алқа тағынды. Алдағы уақытта сол жағалауда тұратын 5 көп балалы ана да марапатталатын болады.

Еске салайық, «Алтын алқа» және «Күміс алқа» төсбелгілері 1993 жылы ҚР Президенті Нұрсұлтан Назарбаевпен бекітілді. «Күміс алқа» медалі алты бала, ал «Алтын алқа» жеті және одан көп бала туған аналарға беріледі.

Тамыз айының екінші жексенбісі — «Құрылысшылар күніне» орай, бүгін Шымкенттегі әкімшілік-іскерлік орталығындағы «Көрме орталығы» ғимаратында облыс аумағындағы барлық құрылыс компаниялары, техникалық және авторлық қадағалаушы мекемелерінің қатысуымен төл мерекені атап өту мақсатында салтанатты шара өтті, деп хабарлайды ОҚО әкімінің баспасөз қызметі.

Кездесу барысында облыс әкімінің орынбасары Ж.Бөкенбаев «Құрылысшылар күні» мерекесімен барша қатысушыларды құттықтап, құрылыс саласында облысымыздың дамуына сіңірген еңбегі мына жұмысшыларды марапаттады.

Шара барысында жалпы саны 18 құрылыс саласының мамандары «Құрметті құрылысшы» төс белгісі мен ОҚО әкімінің грамотасы және алғыс хаттарымен марапатталды.