Jas.kz

Қазақстанның Тұңғыш Президенті күні қарсаңында Алматы облысының өңірлік коммуникациялар қызметінде өткен кезекті брифингте Елбасы туып өскен Қарасай ауданының жетістіктері сараланды.

Бүгінгі таңда Қарасай ауданында 18 ірі өндірістік кәсіпорын жұмыс істейді. Оның ішінде 16-сы Сапа менеджменті және халықаралық ИСО жүйесі бойынша абыройын асқақтатып тұр. Мәселен, «Хамле Компани ЛТД» ЖШС — кондитерлік өнімдер, «Азия Агро Фуд» АҚ – ұн, «RG Brands Kazakhstan» ЖШС – сусындар, «Kagazy Recyling» ЖШС қағаз және гофро өнімдерін шығарады. «Efes Kazakhstan» АҚ  ЖК – алкогольді, ал «Кока Кола» ЖШС СП алкогольсіз сусындар шығаруға бағытталған. Осы  алты кәсіпорын аудан өнеркәсібінің 70 пайызын құрап отыр. Бұл туралы брифингте Қарасай ауданының әкімі Махаббат Бигелдиев айтты.

Биылғы қаңтар-қазан айлары аралығында негізгі капиталға инвестицияның тартылуы 95,3 млрд. теңгені құрап, бұл көрсеткіш өткен жылдың осы мерзімімен салыстырғанда 16,5 млрд. теңгеге көбейген. Нақты көлем индексі 116,0%. Алматы облысы көрсеткішіндегі аталған ауданның үлесі 23,0 пайызды құрайды.

Ауданда бүгінгі таңда шағын және орта кәсіпкерлікпен айналысатын 13 мыңнан астам мекеме тіркелген, оның ішінде шағын кәсіпорындар – 2528, жеке кәсіпкерлер – 6564, ауылшаруашылық саласындағы нысандар – 3933. Бүгінгі күні кәсіпкерлік бағытында 55900-ден астам адам жұмыс істейді, олардың орташа жалақысы 110 мың теңге. Бюджеттік төлемдер түсімі 7,1 млрд. теңгені құрап отыр.

Қарасай ауданы бойынша жалпы ауылшаруашылық  өнімдері 2016 жылдың 10 айында  38,6 млрд. теңгені құраған. Ауданда ауылшаруашылық өнімдерін өндіретін бес ірі мекеме бар. Мәселен, «Арай» шаруа қожалығы мен «Медеу Коммерц» ЖШС  – сүт өнімдерін, «Қазақстан құстары» ЖШС, «Мамед» шаруа қожалығы, «Алсад Казахстан» ЖШС жұмыртқа өндірсе, «Жетісу» СПК мал және өсімдік шаруашылығымен айналысады.

Бюджетке  түсетін салықтар мен басқа да міндетті төлемдер  20,3 млрд.  теңгені құрап,  жоспар 98,0 %-ке орындалған. Республикалық бюджетке 9,1 млрд. теңге түскен. Жергілікті  бюджетке  түскен  түсім – 11,2 млрд. теңге немесе 95,2 %, меншікті  кіріс 9,5 млрд. теңге (92,8 % ) болып отыр.

Алматы облысының өңірлік коммуникациялар қызметі

Талдықорған қаласында 40 пәтерлі коммуналдық үй пайдалануға берілді. Көптен күткен жаңа қоныс талдықорғандықтар үшін Тұңғыш Президент күні мен Қазақстан Республикасы Тәуелсіздігінің 25 жылдығына тарту болды. Бірінші кезекте пәтерлерге жетім балалар, мүгедектер, көп балалы аналар, толық емес отбасылар, ҰОС мүгедектері мен басқа да кезектегі азаматтар ие болды.

Жаңа баспана иелерін облыс әкімі Амандық Баталов құттықтады.

— Бүгін көпшілікпен бірге мерекелік көңіл күйде өздеріңізге 40 пәтерлі коммуналдық үйдің кілтін тапсырғалы тұрмыз. Бұл айтулы оқиғаның Тұңғыш Президент күні және ел Тәуелсіздігінің 25 жылдығы қарсаңында өтіп отырғаны – үлкен қуаныш. Сіздерді көптен күткен жаңа баспанаға ие болуларыңызбен құттықтаймын! Отбасыларыңызға береке, молшылық пен табыс тілеймін. Мерекелеріңіз құтты болсын! – деген А. Баталов жаңа пәтер иелеріне кілттерін тапсырды.

Қоныс иелерінің атынан жетім балалар санаты бойынша пәтер алған Сергей Малаховский сөз сөйледі.

— Мемлекет қамқорлығының арқасында білім алып, бүгін өзімнің жеке баспанама қол жеткіздім. Қуанышымды сөзбен айтып жеткізу мүмкін емес. Ең алдымен жастарға әрқашан қолдау көрсетіп келе жатқан Президентімізге алғыс айтқым келеді, — деді С.Малаховский.

Жаңа пәтер алғандардың ішінде Жанат Қырғабақов пен Марина Ноженко да өз ризашылықтарын білдіріп, сөз сөйледі.

— Балаларымның үйлі болғанына шын жүректен қуаныштымын. Енді біздің кең, жарық, жаңа пәтеріміз бар. Тұңғыш Президент күні мен Тәуелсіздік мерекесі қарсаңында үй беріп отырғаны біз үшін екі есе қуаныш, — деді Марина Ноженко.

Жалпы, Талдықорған қаласының өзінде ғана 2012 жылдан бері жалпы алаңы 87,8 мың шаршы метр болатын 23 тұрғын үй пайдалануға берілді. Соның нәтижесінде 2 мыңға жуық отбасы баспаналы болды. Биылғы жылдың 9 айында облыс орталығында 4 үй пайдалануға берілді. Жыл соңына дейін тағы 60 пәтерлі коммуналдық үй іске қосылады деп жоспарланған. Сонымен қатар 9 үйдің құрылысы жүріп жатыр. Оның 4-еуі – жеке инвестиция есебінен салынуда. Бұл өз кезегінде тағы 873 отбасының жаңа пәтерлі болуына мүмкіндік бермек.

Кеше Қазақстан Республикасы Тәуелсіздігінің 25 жылдығына орай Алматы облысының орталығы Талдықорған қаласында жаңа талапқа сай қонақ үй кешені пайдалануға берілді. Қаланың оңтүстік-батыс ауданында орналасқан  16 қабатты «Көктем Гранд» көпсалалы қонақ үй кешені жеке инвестордың қаржысына салынып, мұнда қонақ үй және бизнес орталық қызметі қатар ұсынылмақ.

— Тәуелсіздіктің 25 жылдығы аясында ашылып отырған Талдықорған қаласындағы «Гранд Коктем» қонақ үй кешені қаладағы ең заманауи, соңғы үлгідегі, жоғары класты кешен болғалы отыр. Астанада өтетін «Экспо-2017» халықаралық көрмесінің өтуіне байланысты жоғары деңгейдегі қолайлы жағдай қарастырылған қонақ үйлерге деген қажеттілік өсіп отыр. Шетелдік туристерге ұсынылған нысандар тізімінде Алматы облысының да көрнекті орындары енгізілген. Туристік сала өңірдегі ең маңызды салаға айналып келеді. Сондықтан облыс орталығы Талдықорған қаласын көркейте түсу – біздің басты мақсатымыз. «Көктем Гранд» қонақ үй кешені жеке инвестицияға салынған, ортақ іске өз үлесін қосып, Талдықорғанның тартымды қала болуына атсалысады деп сенемін, — деді өз сөзінде А. Баталов.

Ғимараттың лентасы қиылғаннан кейін шашу шашылып, жиналғандар нысанды аралап көрді.

Жалпы, бұл қонақ үй кешені түрлі көлем мен кесіндегі үш блоктан тұрады.

Қонақ үйлік нөмірлер ғимараттың бес қабатында. Ал 3-тен 10-қабатқа дейін бизнес орталықтың кеңселері. Сол сияқты қонақ үй кешенінде мәжіліс залы, мейрамхана кешені мен салтанат залы, бассейні бар фитнес орталық, тренажерлық және қонақ залдары бар.