Jas.kz

Шағын қалалар да жылыту маусымына кірісті. Алматы облысы Сарқан қаласында құны 1,1 млдр. теңге болатын орталық қазандық пен жылу жүйелерінің құрылысы аяқталды. «Сарқан жылу» МҚК-ның жарғылық капиталын қалыптастыру мақсатында арнайы техника сатып алу үшін облыстық бюджеттен 100 млн. теңге, көмір алуға 67,97 млн. теңге бөлінді. Бұл туралы облыстық энергетика және тұрғын үй коммуналдық шаруашылығы басқармасы басшысының орынбасары Әсет Қанағатов мәлімдеді.

Ә. Қанағатовтың айтуынша, бүгінгі күні Сарқан қаласында бюджеттік саланың 14 нысаны орталықтандырылған жылу жүйесіне қосылған.

Сонымен қатар Үштөбе қаласындағы «Жылыту орталығы» ЖШС-ның қазандығына 746,2 млн. теңгеге жаңғырту жұмыстары жасалды. Ал Текелі қаласының «Алатау» және «Достық» шағын аудандарында жалпы ұзындығы 12,5 шақырым болатын магистралды жылу жүйелері төселу үстінде. Бұл өз кезегінде тұрғындардың орталықтандырылған жылумен қамтамасыз етілу деңгейін 19 %-дан 26 %-ға дейін жеткізуге, тозығы жеткен жылу жүйелерін 58 %-дан 50 %-ға азайтуға мүмкіндік береді.

Кеше Астана қаласынан Талдықорған әуежайына өзінің алғашқы сапарын бастаған «Qazaq Air» авиакомпаниясының BombardierQ400 ұшағын облыс әкімі Амандық Баталов бастаған делегация салтанатты жағдайда күтіп алды.

Экипаж мүшелері мен алғашқы рейстің жолаушылары болған ардагерлер қауымын талдықорғандықтар шашу шашып, үлкен қошаметпен қарсы алды. Тұрғындарды тарихи сәтпен, зор қуанышымен құттықтаған облыс басшысы А.Баталов:

— Бұл шара Елбасының өткен жылғы сапарында берген тапсырмасы аясында, сондай-ақ  Көлік жүйесі инфрақұрылымын дамытудың  мемлекеттік бағдарламасы шеңберінде, өңірлерді дамыту мақсатында іске асырылды. Мемлекеттік бағдарлама негізінде халықты тасымалдау қызметінің сапасы жақсарып, ыңғайлы, жайлы самолет беріліп отыр. Талдықорған қаласына осындай жаңа үлгідегі самолеттің ұшуы уақыт талабы деп білеміз.Бүгінгі қуаныштарыңыз құтты болсын! Еліміз аман болып, жақсы істер, игі бастамалар көбейе берсін! – деді.

Сонымен қатар облыс басшысы Талдықорған әуежайын жаңа, заманауи кейіпке келтіру болашақта оның халықаралық мәртебеге ие болуына, Алматы облысының орталығынан Қытайға, Ресей мен Қырғызстанға авиарейс қатынауына мүмкіндік беретінін атап өтті.

Мұнан соң «Qazaq Air» авиакомпаниясының басшысы Блэр Поллок мырза қала халқының қонақжайлығына ризашылығын білдіріп, облыс басшылығына, әуежай ұжымына алғыс айтты. Бұл — Қазақстан бойынша соңғы екі айда «Qazaq Air» ашып отырған он екінші жаңа рейс екен. Алдағы уақытта сұраныс артатын болса, соған сәйкес рейстердің санын да ұлғайтуға мүмкіндік бар екенін жеткізді.

Бүгінге дейін Талдықорған әуежайында кеңестік кезеңнен қалған тар, моральдік тұрғыдан ескірген «ЯК — 40» самолеті қызмет атқарып келген. Енді Талдықорған өңірінің тұрғындары Астана қаласына барлық қолайлы жағдайлар қарастырылған заманауи ұшақпен қатынайтын болады. Рейстер аптасына үш рет, яғни дүйсенбі, сәрсенбі және жұма күндері ұшады. Жаңа ұшақ 78 жолаушыға арналған.

Авиакомпания Астанамен ғана емес, Талдықорғанның Алматы қаласымен де әуе қатынасына қызмет көрсетпекші. Алматы мен Талдықорған аралығына жолаушылар 35 минутта жетсе, Елордамыз бен облыс орталығы аралығының ұзақтығы – орта есеппен 1 сағат 20 минут.

Жалпы Талдықорған әуежайының ұшу және қону алаңын жаңғырту мен жаңа аэронавигациялық кешен орнатуға 11 млрд. теңге бөлініп, белгіленген жұмыстар толығымен аяқталды. Бүгінгі күні әуежайды халықаралық талаптарға сай күрделі жөндеу мен қосымша ғимараттардың құрылысын жүргізу  қолға алынуда. Жөндеу жұмыстары 2016 жылдың бірінші жартысында аяқталады деп жоспарланып отыр.

Сонымен қатар, облыста туризмді дамыту мақсатында Үшарал қаласына аэровокзал салу мен ұшақ қатынасын ашуға бағытталған жұмыстар жүргізіліп жатыр.

Алматы-Талдықорған автокөлік жолы учаскесінде жүргізіліп жатқан жөндеу жұмыстарының сапасы, мерзімі, қауіпсіздігі мәселелері бүгін облыс әкімі Амандық Баталовтың мердігер компаниялардың өкілдерімен  өткізген жиынында сөз болды. Аталмыш учаскенің «Нұрлы жол» мемлекеттік бағдарламасы бойынша «Алматы — Өскемен» республикалық маңыздағы автокөлік жолын жаңғырту шеңберінде жүргізіліп жатқанын айта кету керек.

Жиын барысында «Алматы КазАвтоЖол» АҚ Алматы облыстық филиалының басшысы Батыр Дадамурзаев баяндама жасады. Б. Дадамурзаевтың айтуынша, автокөлік жолының жаңғырту жұмыстарына 7 отандық мердігер ұйым, 1362 бірлік жол-құрылыс техникалары және  3 мың адам тартылған.  Биылғы жылы автокөлік жолының 115 шақырымын іске қосу жоспарланған, оның ішінде 62 шақырымы цемент бетонды жабынды, 53 шақырымы асфальтты бетон. Осы орайда  13 қарашада Сарыөзек–Сарыбұлақ жол учаскесін, ал 1 желтоқсанға қарай жолдың Алғабас – Балпық би бөлігін пайдалануға беру жоспарланып отырғанын айта кету керек.

Сонымен қатар Б. Дадамурзаев өз баяндамасында жөнделіп біткен және әлі жөндеу жүргізіліп жатқан жол учаскелерін қыс мерзімінде күтіп-ұстау мәселесіне де тоқталды.

Бірқатар өзекті мәселелерді талқылап, жиынды қорытындылаған облыс әкімі Амандық Баталов барлық жөндеу жұмыстары облыс басшылығының қатаң назарында екенін атап өтті. Бұл орайда өңір басшысы алдағы қыс мерзіміне дайындық және қауіпсіздікті қамтамасыз ету мәселесіне ерекше назар аударды. Жиын барысында жұмыстары сынға алынған «ДС Нойбург» ЖШС, «Прогресс» корпорациясы» және «СК Құлагер» сияқты мердігер компаниялардың өкілдеріне  жұмыстың сапасы мен мерзіміне қатысты барлық ескертпелерді ескеріп, кемшіліктерді жоюды тапсырды.

— Сапалы жолмен қамтамасыз ету үшін барлық істі өз мерзімінде жауапкершілікпен атқару керек. Өйткені жол қауіпсіздігі деген ең алдымен оның сапасына тікелей байланысты. Сондықтан жолдың сапасы мен қауіпсіздігі ең бірінші орында тұруы тиіс. Бұл талап мерзімін сақтауға да қатысты, өйткені қыс таяп қалды, — дей келе облыс әкімі А.Баталов жұмысты Талдықорғанның маңындағы айналма жолдың құрылысынан бастауды тапсырды.

Елімізде «Арғымақ», «Тайбұрыл» сынды биенің сүтінен жасалған балалар өнімдері шығарылмақ. Бұл туралы ҚТА және ҰСТО президенті, медицина ғылымдарының докторы Төрегелді Шарманов Қазақ тағамтану академиясы, Профилактикалық медицина академиясы және Ұлттық салауатты тағамтану орталығы өткізген баспасөз мәслихатында мәлімдеді.

Бүгін елімізде шыбықтан бұйым тоқитын аалғашқы әлеуметтік шеберхана ресми түрде ашылды. Мұнда бұл өнерге қызығушылық танытатын кез-келген адамға жұмыс істеуге мүмкіндік бар.

«Qazaq Air» әуе компаниясы Алматы — Талдықорған — Астана және Астана — Талдықорған — Алматы бағыттары бойынша жаңа әуе қатынасын іске қосты.

Естеріңізге салар болсақ, Талдықорған әуежайының ұшу және қону жолдары, перроны толығымен жаңартылған. Әуежайда барлық арнайы теxникалар ауыстырылған. Жаңадан әуенавигациялық жабдықтар орнатылған. Осылайша Талдықорған әуежайы қазіргі заманғы әуе кемелерін қабылдауға, жолаушыларға сапалы қызмет көрсетуге толығымен дайын.

«Qazaq Air» әуе компаниясының жаңа бағыттар бойынша ұшу кестесі:

Ұшақ Алматы-Талдықорған-Астана, Астана-Талдықорған-Алматы бағыттары бойынша аптаның 1,3,5 күндері (дүйсенбі, сәрсенбі, жұмада) қатынайды.

Алматы қаласынан сағат 9:10-да ұшқан ұшақ Талдықорғанға сағат 10:05-те қонады, сондай-ақ Талдықорғаннан сағат 10:55-те ұшып, Астанаға сағат 13:00-де қонады.

Кері бағытта Астанадан ұшу уақыты сағат 14:10-да, Талдықорғанға қону уақыты сағат 16:15-те, сондай-ақ Талдықорғаннан сағат 17:05-те ұшқан ұшақ Алматы қаласына сағат 18:00-де қонады.