Jas.kz

Агроөнеркәсіптік кешен субьектілерінің кредиттік-лизингтік шарттары бойынша сыйақы мөлшерлемелерін субсидиялауға өтініштер қабылдау жалғасуда.

«Қазагромаркетинг» АҚ, Алматы облысы бойынша агроөнеркәсіптік кешен субьектілерінің кредиттік-лизингтік шарттары бойынша сыйақы мөлшерлемелерін субсидиялау үшін  қаржы институттарынан құжаттар қабылдайтыны туралы хабардар етеді.

Бағдарламаның шарттары бойынша: айналым қаражатын толықтыру,  негізгі құралдарды сатып алу және құрылыс, ауыл шаруашылығы малдарын, техникасы мен технологиялық жабдығын сатып алу лизингінің сыйақы ставкалары, сонымен қатар,  айналым қаражатын толықтыру,  негізгі құралдарды сатып алу және құрылысқа, ауыл шаруашылығы малдарын, техникасы мен технологиялық жабдығын сатып алу үшін қарызға алынған  қаражаттарды толығымен немесе ішінара өтеудің сыйақы мөлшерлемелері теңгемен жылдық 7 % немесе 10 (он) %-ға және шетелдік валютамен жылдық 5 % немесе 7 (жеті) %-ға төмендетіледі.

Субсидияларды беру шарттары, ұсынылатын құжаттарға қойылатын талаптар, өтініштерді қабылдау және шешімдерді шығару тәртібі  Қазақстан Республикасы Ауыл шаруашылығы министрінің  «Кредиттер, сондай-ақ, технологиялық жабдықтың және ауыл шаруашылығы техникасының лизингі және ауыл шаруашылығы жануарларын сатып алу бойынша сыйақы мөлшерлемелерін субсидиялау қағидаларын бекіту туралы» 2016 жылғы 23 мамырдағы №232 бұйрығымен бекітілген.

Бағдарламаны іске асыру аясында атқарылатын қызметті көрсетуші Оператор болып  агроөнеркәсіп кешені саласында жұмыс істейтін арнайы мамандандырылған «Казагромаркетинг» АҚ анықталған.

 Оператордың мекен-жайы: Алматы облысы, Талдықорған қаласы, Толебаева көшесі 100, 36 оф.

«Казагромаркетинг» АҚ  Call-орталығы 8 800 080 70 80 (Қазақстан бойынша қоңырау шалу тегін).

Алматы облысында  «Қазақстан Республикасының Тәуелсіздігіне 25 жыл» атты кең көлемде шығармалар байқауы ұйымдастырылды. Шараға облыс бойынша 22 мыңға жуық адам қатысты.

Бір мезетте облыстың барлық аудандарында өткен ауқымды шарада  үміткерлер түрлі жанр бойынша сынға түсті. Байқау шартына сәйкес қатысушылар жас ерекшеліктеріне байланысты 4 топқа бөлінді. Бірінші топ 7 мен 9 сынып, екіншісі 10 және 11 сынып оқушылары, үшінші топта  колледж білімгерлері, төртіншісінде  жоғары оқу орындарының студенттері,  зейнеткерлер, мемлекеттік және басқа да қоғамдық ұйым қызметкерлері бақ сынасты. Үздік шығарма иелері республикалық додада облыс намысын қорғайтын болады. Қазір жеңімпаз ретінде 15 адам анықталды.

«Қазақстан Республикасының Тәуелсіздігіне 25 жыл» мемлекеттік тілде жалпыреспубликалық шығармалар байқауы Қазақстан халқы Ассамблеясының ұйытқы болуымен ұйымдастырылды.

ҚазАқпарат

Бүгін облыс әкімінің бірінші орынбасары Л. Тұрлашовтың төрағалығымен облыс әкімдігінің отырысы өтті. Күн тәртібінде екі мәселе қаралды.

Бірінші мәселе – Балқаш және Ұйғыр аудандары әкімдері аппараттарының тұрғындарға көрсетілетін мемлекеттік қызметтер сапасына бақылау жүргізу жұмысы туралы облыс әкімі аппаратының басшысы С. Дүйсембінов баяндама жасады. Баяндамашының сөзіне сүйенсек, қолданыстағы мемлекеттік қызметтер тізіліміне сәйкес облыстың жергілікті атқарушы органдары мемлекеттік қызметтің 174 түрін ұсынады. «Е-әкімдік» ақпараттық жүйесі бойынша 91337, электрондық үкімет порталы бойынша  — 27845 мемлекеттік қызмет көрсетілген. 2016 жылғы 10 айдың ішінде мемлекеттік органдар мемлекеттік қызметтерді көрсету стандарттары мен регламенттерін бұзудың алдын алу мақсатында 21 семинар-кеңес,  оның ішінде 14 көшпелі семинар-кеңес өткізген. Осы жұмыстардың аудан, қалаларда жүргізілу барысына тоқталып, кемшіліктері де айтылды.

Екінші мәселе — «Жұмыспен қамту – 2020 жол картасы» мемлекеттік бағдарламасын жүзеге асыру  мәселесі бойынша облыстық жұмыспен қамтуды үйлестіру және әлеуметтік бағдарламалар басқармасының басшысы Қ. Айтжанов баяндады.  Оның айтуынша, бағдарламаны жүзеге асыруға  биылғы жылы 17,9 млрд. теңге бөлінген. Жыл басынан бастап 27 мың 600 адам адам тұрақты жұмысқа орналастырылды. Бағдарламаның бірінші бағыты шеңберінде бүгінгі күнге 419 жобаның 293-і немесе 69%-ы бойынша жұмыстар аяқталды. Екінші бағыт бойынша 2,5 мың қатысушыға шағын несие берілген. Несие алған бағдарлама қатысушылары арқылы қосымша 2 600 жұмыс орны құрылды. Шағын несие алушылардың негізгі бөлігі — 84% ауылшаруашылық тауарларын өндірсе, 10% қызмет көрсету саласында өз ісін ұйымдастырып, кеңейтті, ал 6% — құрылыс материалдарын өндіру, жиһаз жасау, киім-көрпе тігу цехтары, т.б.шағын өндірістерді ашқан. Дегенмен шағын несие беру ісі Кербұлақ, Алакөл, Қаратал, Ескелді секілді кейбір аудандарда баяу жүргізіліп жатқаны да тілге тиек етілді. Зейнетақы аударымдары бойынша ең төменгі деңгейді көрсетіп отырған және басқа да осы салада кемшіліктерге жол берген аудандар атап өтілді.

Жарыссөзге шыққан Қаратал ауданының әкімі Қ. Бисембаев, Балқаш ауданының әкімі міндетін атқарушы С. Смағұлов Ұйғыр ауданының әкімі А. Тохтасунов және басқа да азаматтар күн тәртібіндегі екі мәселеге қатысты өз өңірлерінде атқарылған жұмыстар мен кемшіліктерді жоюдағы алдағы жоспарларына тоқталды.

Жиынды қорытындылаған облыс әкімінің бірінші орынбасары Л. Тұрлашов аудан, қала әкімдері мен тиісті басқармаларға мемлекеттік қызметтерді уақытылы көрсету, мемлекеттік қызметтерді электронды түрде алу мүмкіндіктері туралы халыққа жете түсіндіру, халықты жұмысқа орналастырудың нақты шараларын пысықтау, жүзеге асырылып жатқан жобалардың сапалы аяқталуын, шағын ниесе қаражатының мақсатты және толық игерілуін қамтамасыз ету шараларын қабылдауды тапсырды.

Қазақстан Республикасы Тәуелсіздігінің 25 жылдығы аясында Алматы облысының шалғайда орналасқан 25 елді мекеніндегі тұрғындарды профилактикалық тексеруден өткізу мақсатында «25 Жұлдызды күн» акциясының  шеңберінде «Скрининг» шарасы басталды.

Акция шеңберінде Талдықорған қаласындағы Журналистер үйінің алдына «Тәуелсіздікке 25 жыл», «25 жұлдызды шара» деген жазуы бар әдемі плакаттермен безендірілген 5 жылжымалы медициналық кешен арнайы әкелінді. Алғаш болып сөз алған облыстық денсаулық сақтау басқармасының басшысы Асхан Байдувалиев «Денсаулық» мемлекеттік бағдарламасы шеңберінде атқарылып жатқан жұмыстарға қысқаша тоқталып, мұндай алдын алу шараларының денсаулық сақтауда тигізер пайдасы зор екенін атап өтті.

— Кәсіби маманданған қызметкерлер жергілікті жерлерге шығып заманауи медициналық құралдарды қолдана отырып, жоғары кәсіби дәрігерлік көмек көрсетеді, сонымен қатар скрининг және басқа да арнайы тексерулер қолжетімді түрде жүргізілетін болады, — деді А. Байдувалиев.

Сүйінбай атындағы облыстық филармония әншілерінің Отан, ел, туған жер тақырыбындағы әндері шырқалып, жиналғандар жылжымалы кешендерді шалғай елді мекендерге салтанатпен шығарып салды. Бұл жылжымалы медициналық кешендер Көксу,  Ақсу, Еңбекшіқазақ, Панфилов аудандары мен Қапшағай қаласының 25 ауылының тұрғындарына медициналық, консультативтік көмек көрсету үшін жолға шықты. Осы акция аясында ауыл тұрғындары медициналық тексерулерден өтіп, арнайы мамандардың кеңесін ала алады.

Шараның мақсаты – профилактикалық тексеру арқылы сырқатты ерте анықтау, шалғайдағы елді мекен тұрғындары үшін медициналық қол жетімділікті арттырып, сала мамандарының кеңесін және елді мекенде орналасқан медициналық ұйымдарда жоқ диагностикалық, құралдық тексерулерді ұйымдастыру.

Жалпы, бүгінде Алматы облысының 1 981 700 тұрғынына 826 медициналық мекеме қызмет көрсетеді. Оларда  4 732 дәрігер мен 13 564 орта медицина қызметкерлері жұмыс істейді. Денсаулық сақтау саласының 2016 жылғы бюджеті 81,2 млрд. теңгені құрайды. Биылғы жылдың 9 айы ішінде облыстық  ауруханаларда 198 756 науқас емделіп шықты. Скринингтік тексерудің арқасында онкологиялық ауруларды ерте бастан анықтау 54,1% жетті.