Jas.kz

Кеше облыс әкімі Амандық Баталов Талдықорған қаласында құрылысы жүріп жатқан бірнеше нысанды аралады.

Аралау сапарын ең алдымен қаланың әуе қақпасы саналатын әуежайдың жаңғырту жұмыстарын көруден бастады. Салынып жатқан арнайы көліктер тұрағының құрылысымен танысып, әуежай қасбетінің сәулеттік шешімі, ғимарат сыртының жобалық шешімі қандай болатынына қазірден назар аударуды тапсырды. Әуежай ғимаратының жылыту жүйелерінің жұмысына, ғимараттың сыртқы жарықтандырылуына қатысты бірқатар сын айтты.

Шығыс шағын ауданында орналасқан «Талдықорған» индустриалды аймағына атбасын тірелді. Мұнда инженерлік-коммуникациялық жүйелерді салу, кәсіпорындардың орналасу, жабдықталу деңгейі туралы облыстық кәсіпкерлік және индустриалды инновациялық даму басқармасының басшысы М. Мұрат таныстырды. Оның айтуынша, темір жол құрылысы қарашаның басында аяқталады. Сол сияқты электрлендіру, сумен қамту, кәріз жүйелерін жасау жұмысы да аяқталуға жақын. Телефон байланысы желілері толығымен жүргізіліп болған. Облыс әкімі осы өнеркәсіп аумағында құрылысы еш қозғаусыз тоқтап тұрған ғимараттардың иелерімен іскерлік бағытында әңгімелесу жүргізуді тапсырды. Сонымен қатар индустриалды аймаққа алып баратын тротуардың сапасыз төселіп жатқанына сын айтып, қайтадан сапалы етіп төсеуге тапсырма берді.

«Қаратал» шағын ауданындағы бұрынғы бассейн аумағында да қазір құрылыс жұмыстарына дайындық жүріп жатыр. Мұнда заманауи бассейн салынып, дәл ортасынан 25-30 метр биіктікке дейін су көкке шапшитын субұрқақ орнатылмақ.  Субұрқақ түнде түрлі түске боялып, жарық шашып тұрады. Бұл аймақта да болған облыс әкімі А. Баталов бассейн маңына асфальт төсеп, автокөлік тоқтайтын орынға лайықтау, жағалауға шағыл құм төгу, киінетін орын, дәретхана секілді барлық қажетті орындардың қарастырылуы қажеттігін айтты. Маңайындағы қураған ағаштарды ғана кесіп, ретке келтіру жайы да сөз болды.

Орталық алаң жанындағы сквер де реконструкциядан өткізіліп жатыр. Орындықтар жаңаланып, тотығу салдарынан беті ақтаңдақтанып кеткен мрамор төсемдері ауыстырылуда. Жұмыстарды сапалы жасауды қадап тапсырған облыс басшысы Мәдениет сарайының сыртқы келбетін сақтай отырып, жаңалау қажеттігін ескертті.

Мұнан соң Абай мен Қабанбай батыр көшелерінің қиылысындағы әкімшілік ғимаратының жөндеу жұмыстарымен танысты. Бұл – 1948 жылы салынған ғимарат. Мұнда қалпына келтіру жұмыстарын жүргізіп жатқан «Ауыл Құрылыс» ЖШС әр қабаттың ортасына қойылған тозығы жеткен ағаш балкаларды швеллермен ауыстырып, ғимаратты жаңалауда. «Мұндай тарихи ғимараттарды сақтап қалуымыз керек. Жаңғыртылып, жаңа кейіпке ие болған ғимаратқа облыстық басқармалар орналасатын болады», — деді А. Баталов.

Арбаттың бойын аралап, «Асыл тау» ЖШС жүргізген көріктендіру жұмыстарын көрді. Біржан сал мен Ақын Сара көшелерінің аралығындағы Тәуелсіздік көшесінің бойындағы скверді осы кейпін сақтай отырып, жаңалауды тапсырды.

Қаланың оңтүстікке шығатын үлкен даңғылын АКЛ базарына дейінгі абаттандыру ісінде де бірқатар олқылықтарды атап көрсетті. Ескертулер жарықтандыру, қарағай егу мен гүл отырғызу жиілігі, тротуарлардың сапасы, орындықтардың түсіне қатысты айтылды.

Сонымен қатар облыс басшысы іргесі қаланып жатқан жаңа драма театрының, Салтанат сарайының құрылыс жұмыстарымен де танысты. Аталмыш ғимараттарды тұрғызумен BI GROUP компаниясы айналысуда. Құрылыс жұмыстарының барысымен компания өкілі А. Тұрсынжанов хабардар етті. Салтанат сарайының сыртқы кейпі, холл, 1-ші және 2-ші залдары, мейрамханасының жобаларын көрсетті.

Облыс әкімі А. Баталов қаланың тиісті құрылымдарына Салтанат сарайы мен драма театрының арасына түсетін жаңа көшенің құрылысын да ерте көктемнен бастауды тапсырды.

— Жалпы, құрылыс жұмыстарының қарқыны жаман емес. Жұмыстың бет алысын байқау мақсатымен осылай аралап көріп тұратын боламыз. Талдықорған ең әдемі қалалардың қатарында болуы керек. Қаланың эстетикалық келбетін сақтау үшін әрбір тұрғын да өз үлесін қосуы қажет. Заңсыз құрылысқа жол бермеңіздер, принципшіл болыңыздар, — деді  А. Баталов қорытынды сөзінде.

«100 нақты қадам» Ұлт жоспарының 61-қадамында «Ет өндірісі мен өңдеуді дамыту үшін стратегиялық инвесторларды тарту. Негізгі міндет шикізат базасын дамыту және өңделген өнімдерді экспорттау» мәселесі айтылған. Алматы облысының Балқаш ауданында ірі қара етінің экспорттық әлеуетін арттыру мақсатында мал шаруашылығы саласында айтарлықтай жұмыстар атқарылуда. Атап айтқанда, «Өтес Био Азия» ЖШС және «Динара Ранч» ЖШС иеліктерінде әрқайсысында 5000 басқа арналған ірі қара малын бордақылау кешендері жұмыс атқарып тұр. Аталған кешендерде бүгінгі күнге дейін 13200 бас ірі қара бұқашықтары бордақыланса, «Бірлік» агрофирмасында 200 бас мал бордақыланып, ішкі нарыққа жыл басынан 1038 тонна сиыр еті өткізіліп, ақшаға шаққанда 1141,8 млн. теңгені құрады. Ал 9 ай уақыт ішінде 10800 тонна тірі салмақта мал еті өндірілген. Бул туралы Алматы облысының өңірлік коммуникациялар қызметі ұйымдастырған көшпелі брифингте аудан әкімі БАҚ өкілдеріне Балқаш ауданының әкімі Ғалым Тоқпеисов айтты.

Сонымен қатар, Жақсылық Үшкемпіровтың иелігіндегі «Жақсылық» шаруа қожалығында мал бордақылау жұмыстары жолға қойылып, Қырғызстан Республикасына 80 тонна ірі қара етін экспортталған. Мұның сыртында Береке ауылында орналасқан «Дарқан» шаруа қожалығы өз қаражаты есебінен 12 млн. теңгеге 200 бас малға арналған бордақылау алаңының құрылысын жүргізуде.

Ауыл тұрғындарын жұмыспен қамтамасыз ету және агроөнеркәсіп кешені өнімдерін өндіру, жеке қосалқы шаруашылықтардың әлеуетін пайдалану жобасы бойынша «Жанұялық бордақылау алаңдары» бағдарламасының аясында Бақбақты ауылдық округінде «Игілік-2009» шаруа қожалығы 30 басқа, жеке кәсіпкер «Кәусар» 50 басқа, Бақанас ауылдық округінен «Аңсар» шаруа қожалығы 40 басқа арналған жанұялық бордақылау алаңдары жұмыс істеп тұр.

Былтырғы мамыр айында Балқаш ауданының Бояулы ауылында медресе ашылған болатын. Ол Қазақстан мұсылмандары діни басқармасының филиалы «Молдақасым ата» мешіті жанындағы қайырымдылық жеке мекемесі деп аталады.

Отыздан астам отбасы шоғырланған, 180-ге жуық  тұрғыны бар Бояулыдағы аталған медресенің бой көтеруіне қолдау көрсеткен ауданның Құрметті азаматы Балтағұл Молдақасымов екен. Бәрекелді дейік.

«Молдақасым ата» мешіті қасындағы қайырымдылық жеке мекемесінде қазіргі таңда 25 азамат төрт оқытушыдан діни сауат ашып, білім алуда. Аталған оқыту мекемесі 2 сынып, 1 оқу залы, асхана, кітапхана және жатақханамен жабдықталған. Кітап  қоры — 12 700 дана.  Медреседен білім алған шәкірттер «Нұр Мүбәрәк» университетіне тікелей жолдама алады. Бұл туралы БАҚ өкілдеріне Балқаш ауданында Алматы облысының өңірлік коммуникациялар қызметі ұйымдастырған көшпелі брифингте ауыл мешітінің имамы Сәкен Сүйеров айтып берді, деп хабарлайды Алматы облысының өңірлік коммуникациялар қызметі.