Jas.kz

ҚР Премьер-Министрі Кәрім Мәсімов Оңтүстік Қазақстан облысына жұмыс сапары барысында кәсіпкерлермен ауыл халқын микронесиелеу және жұмыспен қамту мәселелерін талқылады.

Соңғы жылдары Оңтүстік Қазақстан облысында АӨК-нің барлық бағыттары бойынша тұрақты өсу байқалуда. Аймақтық Индустриаландыру картасының 165 жобасының 65% ауылдық жерлерге негізделген. Қазақстанда ауыл шаруашылығының негізгі көлемін жеке қосалқы шаруашылықтар шығарады (шамамен еттің 70% және сүттің 80%). Сонымен қатар, ауыл шаруашылығы тауарларын өндірушілерге тұтас бір проблемалар кешені кедергі келтіреді, өзекті мәселелердің ішінде несие қаражатының жетіспеушілігі және ауыл шаруашылығы шикізатын дайындау және жинаудың әлсіз дамыған жүйесі болып отыр.

Шағын бизнесті, оның ішінде шағын агроқұрылымдарды қолдау үшін елімізде «Жұмыспен қамтудың жол картасы-2020» бағдарламасы жұмыс жасайды, оны жүзеге асыруға Үкімет баса назар аударады. 2016 жылы ЖҚЖК-2020 аясында Оңтүстік Қазақстан облысындағы ауыл кәсіпкерлігін дамытуға микронесие беруге 7 237,5 млн теңге берілген. Бірінші жартыжылдықта бағдарламаның 736 қатысушысы заемдар алушылар болды, оның орташа мөлшері 2,6 млн теңгені құрады.

Премьер-Министрмен кездесуде аграрлық сектор өкілдері ауыл шаруашылығы өнімдерін жеткізу және сақтауға, сондай-ақ көлік тарифтеріне қатысты мәселелерді көтерді. Бұдан өзге, ауыл шаруашылығын өңдеушілер сапалы шикізат тапшылығы жайлы айтты, соның кесірінен аймақтағы көптеген кәсіпорындар толық қуаттылықта жұмыс істей алмай отыр. Атап айтқанда, облыстағы сүт зауыттарының жүктемесі 81% (қуаттылығы 10,7 мың тонна 17 кәсіпорын), ет комбинаттарының – 73% (қуаттылығы 10,7 мың тонна 16 кәсіпорын). Ауыл шаруашылығы тауарларын өндірушілер үшін өзекті мәселелер бойынша ауыл шаруашылығы вице-министрі Қ. Айтуғанов, денсаулық сақтау және әлеуметтік даму вице-министрі Б. Нұрымбетов сөз сөйледі. Аймақта туындаған проблемаларды шешуге және отандық өнімдердің бәсекеге қабілеттілігін арттыруға көлік-логистикалық орталықтар ашу көмектесетіні атап өтілді.

Оңтүстік Қазақстан облысы әкімі Б. Атамқұловтың мәліметінше, қазіргі уақытта Шымкентте халықаралық стандарттар бойынша көлік-логистикалық орталық құрылысы бойынша жоба әзірленуде. Кешеннің жалпы ауданы 90 гектардан асады, мұнда ауыл шаруашылығы өнімдерін сақтауға, орауға және жөнелтуге барлық жағдай жасалады. Осындай қоймаларды Мақтаарал және Сарыағаш аудандарында және Түркістанда салу жоспарланған.

АӨК өкілдерімен кездесулердің нәтижесін қорытындылай келе, Кәрім Мәсімов Оңтүстік Қазақстан облысының жоғары аграрлық әлеуетін атап өтті. Өңдеу кәсіпорындарының проблемаларын шешу үшін Премьер-Министр Ауыл шаруашылығы министрлігіне мүдделі мемлекеттік органдармен бірге кәсіпорындардың ұсыныстарын жинап, Үкіметке қарауға енгізуді тапсырды, деп хабарлайды ОҚО әкімінің баспасөз қызметі.

ҚР Премьер-Министрі Оңтүстік Қазақстан облысына жұмыс сапары аясында ақсақалдар алқасымен және зиялы қауым өкілдерімен кездесті. Кездесуге қатысқандар аймақтың экономикалық және әлеуметтік-мәдени дамуына қатысты мәселелерді талқылады.

Атап айтқанда, қолжетімді баспана үшін кезекте тұрғандарға арналған көпқабатты үйлердің құрылысы, халықты газбен жабдықтау және туризмді дамыту мәселелері қаралды. Азаматтардың қойған сұрақтарына ҚР мәдениет және спорт министрі А. Мұхамедиұлы, энергетика министрі Қ. Бозымбаев, ұлттық экономика министрінің бірінші орынбасары М. Құсайынов, ҚР ИДМ жауапты хатшысы З. Сағынов жауап берді.

Қазіргі таңда Түркістанда тұрғын үй кезегінде 3600 адам кезекте тұр. Әкімдік алдағы уақытта «Отырар» шағын ауданын салуды жоспарлап отыр. Бүгінде 8 үйдің құрылысы басталды. Олардың ішінде бес қабатты 4 үй «Қазақстан ипотекалық компаниясы» есебіне, тоғыз қабатты 2 үй (72 пәтер) «Отау құрылыс» есебіне, ал «Қолжетімді баспана 2020» бағдарламасы арқылы 60 пәтерлі екі үй салынып жатыр. Жыл соңына дейін барлық 6 тұрғын үйдің құрылысын аяқтау жоспарланып отыр.

Сонымен қатар, биыл ТКШ саласын модернизациялау аясында 22 үй жөндеуден өткізілді. Түркістанды газбен жабдықтау 2014 жылы басталып, «Бейнеу – Бозой – Шымкент» магистральді құбыр желісі бірінші кезекте пайдалануға берілді. Сол сияқты, күші сағатына 100 000 м³ құрайтын автоматтандырылған газ тарату станциясы және 2 газ бақылау нүктесі салынған. Алайда, өңір халқы толығымен газбен қамтамасыз етілмеген. Сонымен қатар, «Көне Түркістан» тұжырымдамасы аясында тарихи-мәдени туризмін дамыту мәселесі қозғалды, деп жазады pm.kz

Алматы облысына жасаған іссапарының қорытындысында «Нұр Отан» партиясы Төрағасының бірінші орынбасары Мұхтар Құл-Мұхаммед партия активінің жиынын өткізді. Жиналысты облыс әкімі Амандық Баталов жүргізді.

 Жиналысты ашқан облыс басшысы нұротандықтардың өңірдің әлеуметтік-экономикалық дамуына қосқан үлесі туралы айтты.

Атқарылған іс жайында партияның облыстық филиалы төрағасының бірінші орынбасары Ғалиасқар Сарыбаев баяндады. Оның айтуынша, бүгінгі күні партия қатарында облыстың 338 бастауыш ұйымға біріккен 114 433 тұрғыны бар. Жыл басынан бері партия мүшелерінің қатарын тағы 14 мыңнан астам адам толықтырған. Ғ.Сарыбаевтың пікірінше, бұл — азаматтардың «Нұр Отанға» деген жоғары сенімнің белгісі.

Жиын барысында облыстық мәслихаттың депутаттық фракциясының жетекшісі Е.Келемсейіт, саяси кеңес бюросының мүшесі Константин Нестеров, партияның Талғар аудандық филиалы төрағасының бірінші орынбасары Мейрамгүл Ермағамбетова сөз сөйледі.

Басқосу соңында партия Төрағасының Бірінші орынбасары М. Құл-Мұхаммед «Нұр Отанның» әрбір белсендісінің қызметіндегі басым бағыт халықпен жұмыс істеу болуы тиіс екенін айта келе партияның облыстық филиалына ҰБТ-дан өтпей қалған жастарды жұмысқа тұрғызу мәселесіне ықпал етуді тапсырды. Сонымен қатар «Нұрлы жол» бағдарламасының орындалуын тұрақты бақылау, әсіресе оған бөлінген қаржының пайдаланылуы мен игерілуін назарда ұстау туралы тапсырма берді.

— Алматы облысы – Тұңғыш Президентіміз – Ұлт Көшбасшысы Нұрсұлтан Әбішұлы Назарбаевтың туған өлкесі. Сондықтан барлық бағыттағы даму көрсеткіштеріңізбен басқа өңірлерге үлгі болуларыңыз керек. Олардың бәрі де Алматы облысына қарап бой түзеуі керек, — деді қорытынды сөзінде М. Құл-Мұхаммед.

Жаңа оқу жылы қарсаңында балалардың қауіпсіздігін сақтау мақсатында жалпы білім беретін мекемелердің жанында жүргізушілер үшін 40 км/сағ дейін «Жылдамдықты шектеу», «Балалар» тыйым салу және ескерту белгілері қойылды, деп хабарлайды қалалық әкімдіктің баспасөз қызметі. Астана қаласының жергілікті полиция қызметінің хабарлауынша, жолдың жүріс бөлігіне де «Жылдамдықты шектеу» белгісі салынған.

Сонымен қатар, балаларға арналған мекемелердің жанында қажетті учаскелерде көлік құралының жылдамдығын төмендетуге мәжбүрлейтін жасанды бұдырлар жасалды.

Астана қаласының ІІД ӘПБ бастығының орынбасары Елжан Чупековтың айтуынша, тиісті шаралар балалардың қатысуымен орын алатын ЖКО санын айтарлықтай азайтады. Алдағы уақытта балалар мекемелерінің жанында жылдамдықты төмендету мақсатында стационарлық жылдамдық өлшегіштер орнатылады.

Айта кетейік, екі күннің ішінде мектептер мен балабақшалардың жанында жылдамдық режимін бұзудың 500 астам фактісі тіркелді.

Бүгін Астанада орталықтандырылған жылумен жабдықтау жүйесіне қосылған 2455 әлеуметтік нысанның 2335-і немесе 90,5% жылыту маусымына дайын. Атап айтқанда, 2146 тұрғын үй, 28 денсаулық сақтау, 152 білім нысаны және 9 мәдениет мекемесі.

Астана қаласы энергетика басқармасының хабарлауынша, 2016–2017 жж. жылыту маусымы басталғанша энергокешен толықтай дайындық төлқұжатын алады, ал басқа әлеуметтік нысандар мен тұрғын үйлер 100% дайын болады, деп хабарлайды қалалық әкімдіктің баспасөз қызметі.

Алдағы жылыту маусымына дайындық пен энергокешенді техникалық ақаусыз жағдайда сақтау аясында «Астанаэнергосервис» АҚ күрделі жөндеу жұмыстарын қолға алды.

«Астана-Энерго» АҚ басты және қосалқы жабдықтарын жөндеу бекітілген кестеге сай жүргізіліп жатыр. Қазіргі кезде ЖЭО-1 — 85%, ЖЭО-2 – 73%, ал аудандық қазандықтар 88% дайын.

«Астана-Теплотранзит» АҚ күрделі жөндеу бағдарламасы бойынша 1,15 км магистральді желі қайта жөнделді. Қазіргі кезде ұзындығы 1,432 км тарату желісін күрделі жөндеу және 3 698 шаршы метрлік құбырдың жылу оқшаулағышы қалпына келтірілді.

Сонымен қатар, «Астана-РЭК» АҚ-да 110 кВ-тық әуе желісін күрделі жөндеу, 10 кВ-тық және 0,4 кВ-тық әуе желілері мен жабдықтарды қалпына келтіру жұмыстары жүргізілуде.