Jas.kz

Ең қызық та қиын кәсіптің түрі – ол бал ара өсірумен айналысатын омарташы кәсібі. Бүгінгі күні Оңтүстік Қазақстан облысының көлемінде 1200 шағын, орта және ірі ара өсіруші жеке және заңды тұлғалар болса, олар жылына көлемінде 100 тонна бал өндіреді, деп хабарлады ОҚО әкімінің баспасөз қызметі.

Бүгінде облыста бал ара шаруашылығын дамыту мақсатында бірқатар жұмыстар атқарылып, оны селекциялық асылдандыру жұмыстарын жүргізгені үшін әрбір ұяшығына мемлекет тарапынан 3190 теңге қолдау қаржы төленуде. Ал 2016 жылы 3 мың ұяшыққа 9570,0 мың теңге қаржы бөлу жоспарланған.

 Оңтүстіктің омарташыларына қолдау көрсетіп отырған мекеменің бірі «Ырыс» микроқаржы ұйымы. Аталмыш ұйымнан қолдау алған шаруашылықтың бірі «ЭкоМёд» ЖШС. Серіктестік ара шарашылығын дамыту үшін қаржы ұйымынан төмендетілген жылдық мөлшерлеме негізінде 5 млн. теңге несие алып, оған 480 дана ара ұяшығын сатып алған. Олар әр ұяшықтан шамамен 25-30 кг., әсел өнімін алады. Биыл шаруашылыққа Австрия мен Украина елдерінен асыл тұқымды карпаттық бал аралары әкелінді. Араның бұл түрлері балды жақсы жинайды әрі ауа-райына жылдам бейімделеді. Балдың аққурай және таулы түрлерін өндіретін шаруашылық өндірілген өнімдерін Қазақстанның солтүстік және орталық областарына және көрші Ресей еліне экспорттаған.

Сондай-ақ, облыста бал ара шаруашылықтарды ғылыми сүйемелдеумен айналысатын «Оңтүстік-Батыс мал және өсімдік шаруашылығы ғылыми зерттеу институты» ЖШС-де бал ара шаруашылығы секторы жұмыс жасайды. Ал бал аралар аналығын қолдан ұрықтандырумен ЖК «Демидов» айналысып келеді.

Айта кетейік, өңірде  «Облыстық әуесқой омарташылар қауымдастығы» жұмыс істейді. Бұл қауымдастыққа 250 бал ара өсірушілер мүше.  Қауымдастық төрағасы Төрехан Нормұхамбетов.

Премьер-Министр Кәрім Мәсімов «Байсерке Агро» агроөнеркәсіп кешенінің өндіріс қуатымен танысты, деп жазды Алматы облысы әкімдігінің баспасөз қызметі.

Алматыға жұмыс сапары барысында Кәрім Мәсімов агрохолдингтің ғылыми-өндірістік орталығы мен сүт кешенін аралады, сондай-ақ «Етті мал басы» көрмесін қарап шықты. Жыл сайын «Байсерке Агро» ЖШС 1800 тонна сүт және 1250 тонна ет өнімдерін шығарады, өңірдің азық-түлік қауіпсіздігін қамтамасыз етуге өз үлесін қосып келеді.

Сондай-ақ, кәсіпорын дәнді дақылдарды өсірумен айналысады. Агрохолдинг активінде шамамен 3600 га егіс жерлері бар, оның 500 га-да жер асты тамшылап суару жүйесі қолданылады.  Премьер-Министрге түсімді бірнеше есеге арттыруға мүмкіндік беретін суарудың озық жүйесі көрсетілді.

Ауыл шаруашылығы жерлерін аралау барысында Алматы әкімінің орынбасары Е.Аукенов Кәрім Мәсімовке Алматы маңындағы азық-түлік белдеуін дамыту туралы айтып берді. Осылайша, 2016 жылы азық-түлік белдеуі бағдарламасы аясында құны 56,2 млрд теңге болатын 54 жобаны жүзеге асыру жоспарланған.

Кәрім Мәсімов Қазақстанда АӨК өсудің маңызды әлеуетіне ие, бірақ саланы одан әрі дамыту үшін қазақстандық шаруалар ғылыммен тығыз байланыс орнату қажет екенін айтып өтті.

«Байсерке-Агро» базасында ғылыми кластер құрылғанын айта кеткен жөн. Агрохолдинг Қазақ өсімдікті қорғау және карантині ҒЗИ, Қазақ мал шаруашылығы және жемшөп өндірісі ҒЗИ ғалымдарымен белсенді ынтымақтастық жүргізеді.

Соңында Премьер-Министр асыл тұқымды жылқы өсіретін жылқы зауытын аралады.

Анықтама үшін:

2008 жылы Мемлекет басшысы Нұрсұлтан Назарбаев Алматының айналасында азық-түлік белдеуін құру бойынша бағдарлама жасауды тапсырды. Алматы облысындағы агроөнеркәсіп кешенінің алдында еліміздің ең ірі қаласының тұрғындарын сапалы және балғын азық-түлік өнімдерімен қамтамасыз ету міндеті қойылды.

«Оған Жамбыл облысын, Оңтүстік Қазақстан облысын қосу қажет. Олар үшін бұл нарық, ал қала үшін – азық-түлік тауарларымен молықтыру, және бұл аса маңызды азық-түлік бағаларының көтерілуіне жол бермейді», — деп атап өткен еді ҚР Президенті.

Астана қаласы бойынша мемлекеттік кірістер департаменті мүлікті заңдастыру үстіміздегі жылдың 31 желтоқсанына дейін жалғасатынын еске салады, деп жазады astana.gov.kz. Заңдастыруға ақша, бағалы қағаздар, заңды тұлғаның жарғылық капиталына қатысу үлесі, басқа адамның атына рәсімделген мүлік және ҚР аумағынан тыс орналасқан мүлік жатады. Ақша қаражатын заңдастыру үшін оларды банк шоттары арқылы көрсетіп, оны өз еркінше жұмсай алады – бизнеске жұмсайды, жылжымайтын мүлік сатып алады және т.б. Бұл жағдайда ақшаның 10 пайызы алым ретінде алынады.

Сонымен қатар, шетелде немесе қолма-қол айналымдағы ақшаны банк шоттарында көрсетпей, өтініш жазу арқылы жария етуге болады. Бұл ретте бюджетке 10 пайыздық алым төленеді.

Ақша қаражатынан басқа мүлікті жергілікті атқарушы органның жанындағы комиссияға өтініш беру және тиісті құжаттарды беру арқылы заңдастыруға болады. Бұл ретте алым алынбайды.

Мүлікті заңдастырған адам оны тіркеу, соның ішінде құжаттарды дайындау мен жасау бойынша шығындарды көтереді.

Акцияның шарттары мүлікті артық уақыт пен материалдық шығынсыз заңдастыруға мүмкіндік беретіндіктен өте тиімді болып табылады. Атап айтқанда жария ету процедурасы бұрын тіркелмеген мүлікті (ғимарат, құрылыс және т.с.с.) мемлекеттік кірістер органдарына декларациялар беру арқылы жеңілдетілген тәртіпте тіркеуге мүмкіндік береді.

Қазақстаннан тыс орналасқан мүлікті жария ету үшін 10 пайыздық алым алынады.

Заңдастырылған мүлік пен ақша салық алу мақсатында кіріс болып танылмайды, сәйкесінше табыс салығы салынбайды.

Айта кетейік, мүлікті заңдастырумен байланысты кез келген мәліметтер салықтық және бакнтік құпия болып саналады. Ақпаратты таратқаны үшін қылмыстық жауапкершілік жүктеледі.

Бүгін өңір басшысы Б. Атамқұлов Ақтөбеде ерлікпен қаза тапқан ҚР Ұлттық Гвардиясының сарбазы Досбол Сапардың отбасына Шардара қаласынан 4 бөлмелі жеке тұрғын үйдің кілтін табыс етті, деп жазады ОҚО әкімінің баспасөз қызметі.

Бұл баспананы марқұм Досболдың шаңырағы деп білетінін жеткізген өңір басшысы осындай отаншыл ұлды дүниеге әкелген оның ата-анасына алғысын білдірді.

Салтанатты рәсімге сонымен қатар, ОҚО ІІД-нің бастығы, полиция генерал-майоры А.Оспанов, ОҚО ІІД ЖПҚ-нің бастығы, полиция полковнигі Б.Абылаев және Досбол Сапардың бауырлары мен туыстары, ішкі істер департаментінің жеке құрамы мен БАҚ өкілдері қатысты.

Облыстық ішкі істер департаменті мен жерлігікті полиция қызметкерлерінің бір күндік жалақысына алынып, марқұм Досболдың отбасына берілген жаңа үйдің ауданы 138 шаршы метрді құраса, қосымша шаруашылық алаңшасы 108 шаршы метр. Мұнан бөлек, ортақ қаржыдан отбасы мүшелері үшін

ірі қара мен ұсақ малдар және тұрмыстық техникалар, компьютер мен қажетті жиһаздар алып берілді.

Естеріңізге салсақ, 1997 жылы туылған Шардара ауданы Көксу ауылының тұрғыны ҚР Ұлттық Гвардиясының сарбазы Досбол Сапар Еркінбекұлы 2016 жылдың 5 маусым күні Ақтөбедегі №6655 әскери бөліміне жасалған қарулы шабуылдан қаза тапқан болатын.

Кеңес Одағы кезінде Сайрам ауданындағы ауыл шаруашылық машиналарын жасайтын «Манкентсельмаш» зауыты шетелдерге әйгілі болатын. Ондағы су көтергіштер, су сорғыш станцалар және басқа да ауыл шаруашылығына қажетті машиналар кәсіпорыннан барлық Одақтас Республикаларға және басқа да Азия және Африка елдеріне жіберіліп отырылған.

90-шы жылдары тоқырауға түскен бұл зауыт кейіннен қанатын кеңге жайып, еңсесін көтере бастады. Күн сайын зауыт өніміне тапсырыс артып, шетелдіктер қызығушылық танытуда. 2014 жылы  Түркменстанға 250 дана су көтергіштер жіберілген.

Тапсырыстардың саны артқанда, кадрлардың жетіспеушілігін байқаған зауыт басшылығы  мамандар даярлайтын колледж ашып, өзіне қажетті кадрларды даярлай бастады. Оқыту жүйесі дуальды түрде, яғни партада көп отырғаннан гөрі, студенттерді өндірісте көп жүргізу. Білім алушыларға барлық жағдайы қарастырылған арнайы жатақхана ашылды. 2014 жылы бірінші бітірушілер бүгінгі таңда металл технологиясын игеріп, ресми түрде зауытта еңбек етіп, жаңа мамандармен тәжірибе алмасуда. Осы тұрғыда зауыт ұжымы жасаруда. 2015 жылы жұмысшылардың еңбек жалақысы да көтерілген.

2016 жылдың 6 айында Сайрам  ауданының өңдеу өнеркәсібінің өнім көлемі 7496,9 млн.теңгені құраса, оның ішінде машинажасау саласында өнім көлемі 662,8 млн.теңге. Бұл 2015 жылдың өнім көлемімен салыстырғанда 3 есеге артқан. Бүгінгі таңда өндірісте 180 адам еңбек етуде. Бюджетке төленген қаржы көлемі 1,7 млн.теңгені құрап отыр.

Алдағы уақытта зауыт бәсекеге қабілеттігін арттыру үшін  тауардың түрлерін көбейтіп,  жаңа технологияларды ендіруді көздеп отыр.

«Аграрлық несие корпорациясы» АҚ облыстың Талғар ауданы Арқабай ауылындағы сүт және сүт өнімдері өндірісін дамытуға арналған жобаны қаржыландырды.

Корпорацияның баспасөз қызметінің хабарлауынша, Мемлекет басшысы Нұрсұлтан Назарбаевтың бес институционалды реформасын жүзеге асыруға бағытталған 100 нақты қадам — Ұлт жоспарының 60 қадам аясында, корпорация Алматы облысы, Талғар ауданы, Арқабай ауылында сүт және сүт өнімдері өндірісін дамытуға арналған жобаны қаржыландырған.

Корпорацияның қаржылай қолдауы арқасында 500 млн теңгеден аса несие алған «Байсерке-Агро» ЖШС қолындағы сүт-тауарлы фермасының қуаттылығын 850 бас ірі қара малға дейін арттыруға мүмкіндік алды.

Корпорацияның қолдауы есебінен шаруашылыққа қажет жаңа құрал жабдықтар сатып алынып, құрлыс жөндеу жұмыстары аяқталды, сондай-ақ, сүт-тауарлы фермасы алдағы уақытта тәулігіне 16 тонна сүт сауып, осы арқылы  жылына 5 мың тонна сүт өндіруді жоспарлап отыр.

Еске сала кетсек, «Аграрлық несие корпорациясы» АҚ, 2001 жылы ҚР Үкіметі қаулысымен құрылған компания. Негізгі мақсаты — аграрлық саланы Қазақстан Республикасы агроөнеркәсіпкешені субъектілерін қолжетімді несиелеу жүйесін дамыту арқылы индустриаландыру және әртараптандыру. «ҚазАгро» Ұлттық басқарушы холдингінің құрамына кіреді.