Jas.kz

3 шілдеде «Хан Шатыр» СОО жанындағы алаңда «Мыңжылдықтар тоғысындағы Астана» көшпелілер өркениеті фестивалі өз шымылдығын ашады. Дәстүр бойынша Елорданың туған күніне орай нағыз ежелгі көшпелілер ауылы орын тебеді. Мұнда ата-бабаларымыздың тыныс-тіршілігімен және тұрмысымен танысуға болады, деп хабарлайды қалалық әкімдіктің баспасөз қызметі.

Аумақта «Көшпелілер музейі» ашылады. Көшпелілер циркі, би ұжымдарының өнері, дәстүрлі «Ат жалында» атты каскадерлік шоу, «Саят» аушы құстар думаны және салт-жоралық, музыкалық фольклор фестиваль бағдарламасы көрермендерін одан сайын қызықтыра түспек. Қалашыққа келетін ең кішкентай қонақтар үшін кіреберісте киізден алаңқай жасалады. Ал «Костюмдер тарихы» бағдарламасында Ұлы дала төсінде киген киім-кешекпен, оның тарихымен танысуға болады.

Этноауыл қонақтары қазақ халқының мәдениетінің әралуандылығымен таңғы сағат 11-ден кешкі 22.30-ға дейін таныса алады. Әдеттегідей, шараға Қазақстанның өңірлерінен ғана емес, сонымен қатар, таяу шетелдерден де халық қолөнерінің шеберлері келеді. Шеберлік дәрістер барысында қолөнершілер қарапайым жіптен ою-өрнекті кілем тоқу немесе металл кесегінен көздің жауын алатын әшекейлер жасау өнерін ортаға салады. Сондай-ақ олардың еңбектерін қолданбалы өнер заттары сатылатын жәрмеңкеден табуға болады.

Сонымен қатар, күн сайын ерекше сазды концерттер ұйымдастырылады. Мысалы, шараның ашылуында сағат 16.00-де ұлт-азаттық көтерілістің 100 жылдығына арналған эпикалық әндерді тыңдауға болады. Ал кешке сағат 21.30-дан 22.30-ға дейін қонақтар Нұрлан Өнербаевтың концертін тамашалайды. Келесі күні қазақ халқының ұлы ақыны Жамбыл Жабаевтың 170 жылдығына орайластырылған концерт өтеді. Мұнда ақынның қанатты шабытпен дүниеге келген шығармаларын тыңдауға болады. Ал шараның соңында келушілер «Жүйелі сөз» дәстүрлі ақындар айтысын тамашалайды.

5 шілдеде сағат 16.00-де қонақтар үшін атақты әнші, композитор Дәнеш Рақышевтың 90 жылдығына орайластырылған «Күміс көмей» дәріс концерт ұйымдастырылады. Содан кейін сағат 19.00 ақындар ақтық сында сөз жарыстырады.

Фестивальдің соңғы күні жыр төгіліп, күй күмбірлейді. «Хассак» және «Сарыарқа» фольклорлық-этнографиялық ансамбльдердің концертінен кейін сағат 17.00 еліміздің Тәуелсіздігінің 25 жылдығына арналған эпос кеші өткізіледі. Аталмыш кең ауқымды шараның шымылдығы дәстүрлі «Астана-Арқау» түркі музыкасы фестивалімен жабылады.

Көшпелілер өркениеті фестивалі сағат 20.00 «Той тарқар» шарасымен салтанатты түрде жабылады.

Ертең, 2 шілдеде дәстүрге айналған «Азия жаңғырығы» халықаралық цирк өнері фестивалі ашылады. Жыл сайынғы шара көрермендерін тәнті етпек. Бүгін астаналықтар фестивальдің жарқын шараларының бірі – дәстүрлі кавалькаданы тамашалады. Цирк әртістері үрмелі аспаптар оркестрінің сүйемелдеуімен қала көшелерімен жүріп өтті, деп хабарлайды қалалық әкімдіктің баспасөз қызметі.

Мерекелік шеру Астаналық цирк жанынан басталып, Қабанбай батыр даңғылымен, Достық көшесімен, Түркістан және Қонаев көшелерімен жүріп, Астаналық циркке келіп тоқтады.

Фестиваль қатысушылары үлкен автобусқа мінді. Шеруді жануарлар, аттар, пони, түйелер бастап жүрді. Өтіп бара жатқан адамдар мен көлік жүргізушілері парад қатысушыларын қошеметтеп, естелікке суретке түсті.

Биыл Астаналық цирк көрермендерін жаңа номермен таң қалдырмақ. Екі әртіс күрделі жанр — штейн-трапта өнер көрсетпек. Цирк өнері марафонына сегіз мемлекеттің әртістері қатысады. Белоруссия, Голландия, Қазақстан, Қырғызстан, Монғолия, Ресей, Түркменстан және Эфиопия елдерінің дүниежүзілік фестивальдердің жүлдегерлері мен лауреаттары, өз жанрларындағы хас шеберлер, цирк өнеріндегі әулеттердің ұрпақтары өздерінің виртуоздық көрсетілімдерін қонақтардың назарына ұсынатын болады. Әртістердің көбі елордалық цирк күмбезінің астында алғаш рет өнер көрсететін болады.

Қала тұрғындары мен қонақтары цирк өнері фестивалін шілденің 2-сі мен 7-сі аралығында тамашалайды.

Қ. Қуанышбаев атындағы Мемлекеттік академиялық қазақ музыкалық драма театры 30 маусым күні сағат 19.00-де ХХV мерейтойлық маусымын М.Әуезовтің «Абай» трагедиясымен жабады.

Театр ұжымы үшін ХХV мауысым (2015 жылдың екінші жартыжылдығы мен 2016 жылдың бірінші жартыжылдығы) табысты әрі тың жаңалықтарға толы маусымның бірі болды. Себебі, биыл Тәуелсіздікпен құрдас қарашаңырақ өзінің мерейлі маусымына аяқ басты.

ХХV МЕРЕЙТОЙЛЫҚ МАУСЫМНЫҢ ЖЕТІСТІКТЕРІ:

Жыл премьералары:

1. М. Әуезов пен Қ.Ысқақтың «Қараш-қараш» драмасы. Қойылым режиссері – ҚР еңбек сіңірген қайраткері Әлімбек Оразбеков;

2. Т. Теменовтің «Аққудың көз жасы…» лирикалық драмасы;

3. О. Жанайдаровтың «Жұт» драмасы. Қоюшы режиссері – Башқұртстанның еңбек сіңірген қайраткері Айрат Абушахманов;

4. А. Чеховтың «Шие» комедиясы. Қоюшы режиссері – Сергей Потапов. Якутиядан арнайы шақыртылған танымал театр және кино режиссері, «Золотая маска» сыйлығының иегері;

5. Р. Мұқанованың «Сарра» драмасы. Қоюшы режиссері – ҚР еңбек сіңірген қайраткері Гүлсина Мерғалиева;

6. А. Айларовтың «Сүрінген сүрбойдақ» комедиясы. Қоюшы режиссері – ҚР еңбек сіңірген қайраткері Әлімбек Оразбеков;

7. Ж. Ерғалиевтің «Есігімді қаққан кім?…» драмасы. Қоюшы режиссері – ҚР еңбек сіңірген қайраткері Нұрлан Жұманиязов.

Театр ұжымы қатысқан фестивальдер:

– 2015 жылы Өскемен қаласында өткен XXIII Республикалық театрлар фестиваліне В. Ежовтың «Бұлбұлдар түні» пьесасының негізінде сахналанған «Тыраулап ұшқан тырналар» атты лирикалық драмамен қатысып, «Үздік режиссерлік шешім» номинациясына ие болды. Қойылым режиссері, Қазақстанның Халық артисі – Т. Теменов;

2015 жылы Атырау қаласында өткен драматург Рахымжан Отарбаевтың Халықаралық театр фестивалінде «Көлеңкесіз жолаушы» драмасымен қатысып, режиссері, Қазақстанның еңбек сіңірген қайраткері – Н. Жұманиязов «Үздік режиссер» номинациясын, актриса А. Бермұхамбетова «Үздік актриса» номинациясына ие болды;

2015 жылы 29 қараша мен 6 желтоқсан аралығында Мәскеуде қаласында XIII Халықаралық «Золотой Витязь» театр форумында «Тыраулап ұшқан тырналар» лирикалық драмасымен қатысып, Гран-при иегері атанды. Сондай-ақ, қойылым барысында өз өнерлерін ортаға салған Қазақстанның Халық артисі Тілектес Мейрамов – полковник Лукьянов, актер Әбілмансұр Серіков – Пернебек Боранбаев, актриса Ақмарал Танабаева – Инга рөлдері үшін «Золотой Витязьдің» алтын дипломанттары атанды;

2016 жылдың ақпан айының 26 мен наурыз айының 3 аралығында Челябі қаласында (Ресей) МАУ «Спартак балалар мен жасөспірімдердің кино-театр орталығы» өткізген «CHELoBEK ТЕАТРА» IV Халықаралық кіші форум театр фестиваліне Астана қалалық Қ. Қуанышбаев атындағы Мемлекеттік академиялық қазақ музыкалық драма театры А. Вальехоның «Күн сәулесі түспеген» психологиялық драмасымен қатысып, театр ұжымының еңбегі жоғары деп бағаланды;

2016 жылдың 27 мамыр мен 2 маусым аралығында Ресей Федерациясының Орынбор қаласында өткен VIII Халықаралық «Гостиный двор» театр фестиваліне «Тыраулап ұшқан тырналар» (авторы: В. Ежов, режиссері: Т.Теменов) лирикалық драмасымен қатысты.

Гастрольдік сапарлар:

– 2016 жылдың 25-30 сәуір аралығында Тәуелсіздіктің 25 жылдық мерейтойы аясында Астана қаласының Қ. Қуанышбаев атындағы Мемлекеттік академиялық қазақ музыкалық драма театры Талдықорған қаласында гастрольдік сапарда болды.

baq.kz