Jas.kz

1. Ыңғайлы уақытты күтпеңіз.
   Егер сіз ыңғайлы уақыттың болғанын күтіп жүре берсеңіз, ешқашан да әрекет ете алмайсыз. Әрқашан сізге кедергі келтіретін нәрсе кездеседі. Белгілеген уақытыңыз сәйкес келмейді немесе тым үлкен бәсекелестік болады. Шынайы өмірде істі бастауға ыңғайлы уақыт ЖОҚ. Сіз әрекет етуді бастап, кездескен мәселелерді шешуіңіз керек. Ыңғайлы уақыт өткен күндерде қалды. Келесі мүмкіндігіңіз – дәл қазіргі уақыт.
2. Істің адамы болыңыз. Істі жоспарлауға емес, орындауға жаттығыңыз. Спортпен айналысқыңыз келе ме? Бастығыңызбен сөйлесуіңіз керек пе? Дәл қазір жасаңыз. Идея ойыңызда қалған сайын, оның күші әлсірей береді. Бірнеше күннен кейін бөлшектері жоғала бастайды. Бір аптадан соң ойыңызды да ұмытасыз. Істің адамы болу арқылы сіз көбірек әрекет етіп қана қоймай, жаңа идеялардың пайда болуын қамтамасыз ете аласыз.
3. Есіңізде сақтаңыз: идея өзінен-өзі сізге табыс әкелмейді. Идея маңызды, бірақ оларды жүзеге асырғанда ғана бағаланады. Жүзеге асырылған идея өзінің уақытын күтіп тұрған керемет идеялардан артық. Егер сізде өзіңіз сенетін идеяңыз болса, міндетті түрде әрекет етіңіз. Іске көшпейінше, ешқашанда алға жылжи алмайсыз.
4. Қорқынышты жеңу үшін әрекетті қолданыңыз. Байқасаңыз, ел алдында сөйлеудегі ең қиыны – өз кезегімізді күту. Кәсіби ораторлар мен әртістердің өзі қойылымның алдында үнемі қобалжиды. Олар сөйлей бастаған уақытта, қобалжу сейіледі. Іс-әрекет – қорқынышты жеңудің ұтымды құралы. Ең қиыны, алғашқы рет әрекет ету. Істі бастап кетсеңіз ғана, ары қарай өзіңізге сенімділігіңіз артып, жеңілірек болады. Әрекет ету арқылы қорқынышты жеңіп, сенімділігіңізді арттырыңыз.
5. Автоматты түрде шығармашылық механизміңізді қосыңыз. Шығармашылық процеске қатысты ежелден қалыптасқан ой – шабыт келген уақытта жұмыс жасау. Егер сіз шабытты күтер болсаңыз, сирек және ұзақ үзілістермен жұмыс жасауыңызға тура келеді. Күтудің орнына, шығармашылық механизміңізді автоматты түрде іске қосыңыз. Егер сізге жазу керек болса, отырыңыз да, жазыңыз! Қаламды алыңыз. Не жаза аласыз, бәрін жазыңыз. Жай ғана таныс іс-әрекеттерді жасау арқылы, ми жұмысын дұрыс арнаға бағыттайсыз.
6. Бүгінгі күнмен өмір сүріңіз. Назарыңызды қазір істей алатын нәрсеге аударыңыз. Бір апта бұрын жасау керек немесе болашақта жасауыңыз керек нәрселерді уайымдамаңыз. Сіз бірнәрсені өзгерте алатын уақыт – бүгінгі күн. Кешегі күн мен ертеңгі күнді көп ойласаңыз, жетістікке жете алмайсыз.
7. Бірден іске көшіңіз. Әдетте, адамдар әңгімелескенді ұнатады, тіпті, іскерлік кездесуде де әдетке айналған. Мұндай жағдай жалғыз жұмыс жасайтын адамдармен де кездеседі. Маңызды іске кіріспес бұрын пошта жәшігіңізді немесе әлеуметтік желілерді қаншалықты жиі тексересіз? Бұл әдеттерден арылып, бірден іске көшуді үйренбесеңіз, көптеген қиыншылыққа кездесесіз. Бірден іске көшетін адам болу арқылы сіз өзіңізден өнімділігіңізді арттыруға күш-қуат таба аласыз, ал, адамдар сізден көшбасшыны көре алады.

Белгілі бір адамның бұйрығынсыз, өз еркіңізбен жұмыс жасау үшін ұйымдасқан адам болу керек. Жаңа бастамаларды қолдан жібермеңіз. Ойыңызға идея келсе, бірден жүзеге асыра бастаңыз. Сонда ғана, сіздің табандылығыңызды көріп, көзге іледі. Жоғарыда отырғандарға ешкім не істеу керектігін айтпайды. Егер оларға қосылғыңыз келсе, тәуелсіз әрекет етіңіз.

Автор: Ботакөз Қамзан

Егер сіз әр 5 минут сайын телефонға телміріп, гаджетіңіздің болмай қалу ықтималдылығының өзі сізді қорқытатын болса, мына мақала сіз үшін. Мұнда жаман әдетіңізді нысаналап, одан құтылудың жолдарымен танысасыз. 

Checky

Бұл әдеттен арылу үшін алдымен, сіз оны толық зерттеп алуыңыз керек. Checky осы орайда сізге көмектеседі. Бағдарлама сізге оңай демей, қиын демей-ақ сұрақтарға жауап береді. Мысалы, сіз телефоныңызды неше рет ашасыз? Міне, осы тұстан сізде телефонға тәуелділікпен күресу басталады.

Quality Time

Смартфондық әдеттерден арылудың мықты жолын іздесеңіз, Quality Time бағдарламасынан артығы жоқ. Телефонға кеткен уақытты дәл есептеп, әр басылған бағдарламаның статистикасын жасап отырады. Қосымша,  Quality Time «үнсіздік уақытын» жасап бере алады. Ол уақытта телефон сізді мазаламайды. Ал, егер телефоныңыздан сонда да алыс кете алмасаңыз, Quality Time арқылы оны бірнеше уақытқа өшіріп қойыңыз.

Forest

Бағдарлама телефоннан аулақ жүруге, жұмысыңызды алаңдамай жасауға көмектеседі. Әрі мүны ойын түрінде жүргізеді. Телефонды қолданбаған әр 30 минут сайын, бағдарлама телефонның экранына 1 ағаш өсіріп шығарады. Соңында, нәтижені ашып қарайсыз, бақшаңызда биік, әдемі ағаштар тұрса, жарадыңыз. Егер, Forest сізге тек жартылай кеуіп кеткен бұталарды көрсетсе, сіз телефонынан бір минут та ажырай алмайтын жігерсіз жан болғаныңыз.

 BreakFree

Жаман әдеттен арылудың емін көрсете алатын бағдарлама. Бағдарламаны орнатып алғаннан кейін, біраз уақыт ақпарат жинайды. Аддикцияңыздың коэффиценті шыққаннан соң, телефонды бірнеше уақытқа жоспарлы өшіріп қоюдың әдістері ұсынылады.

App Detox

Бағдарлама мәселеге жоғарыдағылардан өзгеше қарайды. Бұған дейін басқалары телефоныңызды барынша аңдып отырса, бұл бағдарлама барынша уақытыңызды көп алатын бағдарламаны зертейді. Мәселен, Facebook, Twitter сіздің зейініңіз бен уақытыңызды алып жүрген болса, App Detox мәселені осы тұста шешуге тырысады.

Бағдарламалар  Play Market арқылы жүктеледі.

Сіз қаншалықты тәуелдісіз? Емделетін кез келді деп ойламайсыз ба?

Автор: Бағила Ағайдар

«Бірінші күннен бастап, жаңа өмір бастаймын, спортпен айналысамын, уақытылы ұйқтаймын….» — барлығымыздың мақсат қойып-қойып алып, келесі бірінші күнге, келесі айға шегеріп, мүлдем іске асырмай тастайтын кезіміз болады. Біздің бірден барлық істі жасап тастағымыз келетіндігінен, кішкене дүниеге де үлгермей қалып жатамыз.

Кейде спортпен айналысуды тым тез, әрі бірден ауыр бастап жібереміз де, аздаған уақыттан соң мүлдем тастап қоямыз. Неге бұлай болады дейсіз бе? Өйткені, әдет, дағды қалыптаспай жатып, ауыр жүк түседі де, ығырыңыз тез шығып кетеді.

«Кайдзен» атты «бір минут» қағидасына негізделген жапон әдісі бар. Әдістің ұстанымы мына дүниеден тұрады: адам алдына қойған мақсатына 1 минут уақыт алады да, сол уақыт ішінде жұмысын орындап тастайды. Бір минут уақыт – өте аз, сондықтан бұрынғыдай еріншектік басып, жарты сағаттық деп ойлаған істеріңізді тез-ақ бітіріп тастайсыз. Сіздің алдыңызда жалқаулық көлегейлемейді. Ойланып қарайсыз —  бір-ақ минутта бітіріп тастасам, қаншама бос уақытым бар!

Секіргіште секіру, көз жаттығуларын жасау, йогамен айналысу, шет тілде кітап оқу – 1 ғана минутыңыз бар кезде тез әрі рахатпен орындалады. Аздаған қадамдардан бастау арқылы, сіз осы уақытқа дейін жалқаулық пен кейінге қалдырудың арқасында іске аспай жүрген істеріңізден үлкен нәтиже көре аласыз.

Бір минутта сіз мақсатыңызды сыйдыра орындауыңыз керек! Шабыттанып, нәтиже шығаруға деген құлшынысыңыз арта түседі. Шарасыздық пен өзіңізді кінәләу сезімінен арыласыз. Содан кейін, бір минутты бес минутқа созасыз, уақыт өте келе жарты сағатқа да қол жетізесіз.

Психология мен кайзден

Психологтардың пікірі бойынша, үлкен мақсаттар қойып, бірден үлкен әрекетті жоспарлау өзімен бірге үлкен қорқынышты да тудырады. Бірақ, кішкентай қадамдардан бастап мақсаттарыңызды іске асырсаңыз, мидың қабылдау процесі,шығармашылық ойлауыңыз жүйелі жұмыс жасайтын болады.

Кайдзен ұғымы Жапонияда дүниеге келген. «Кай» сөзі – үзіліс, «дзен» — даналық деген мағынаны білдіреді.  Менеджменттің осы бір құрылымының авторы Масааки Имаи. Оның айтуынша, кайдзен – жеке өмірде де, бизнес сферасында да нәтиже беретін нағыз жапон пәлсапасы. Жапондықтар менеджмент сферасында  аздан көпке стратегиясын қолданады.

Ал, енді, өзіңіздің қажеттіліктеріңіз бен қалауыңызды анықтап, «кайдзен» әдісін тексеріп көріңіз.

Автор:  Бағила Ағайдар