Jas.kz

Бүгінде жұмысбасты болса да қосымша табыс тауып жүрген жастарымыз қаншама. Көп жағдайда жұмыс пен қосымша кәсіпті қатар алып жүру оңай шаруа емес. Десе де, алдына үлкен мақсат қойған жастар үшін бұл мәселе кедергі келтіре қоймайды. Өзге салада жүрсе де қолөнер бұйымдарына уақыт тауып үлгеретін кейіпкеріміз Эльвира Ерғалинаны кішігірім сөзге тартқан болатынбыз.  

— Әшекей бұйымдарды қай кезден бастап жасай бастадың?

— Қолөнер бұйымдарын жасауға түбегейлі кіріскеніме 4 жылдай болды. Арнайы курсына барып, не бір адамнан сабақ алған жоқпын. Анам — тігінші. Кішкентайымнан көріп өскендіктен шығар, қолөнерге жақындығым. Бірақ, бертін келе тігіннен гөрі əшекей жасауды таңдадым. Менікі əуесқойлық қой, қолым қалт еткенде бір-екеуін жасап қоямын. Басында интернеттен көрген дүниелерді сіңліме жасап беріп жүрдім. Интернеттен суретін көрген құрбыларым да жасап беруімді өтіне бастады. Кейін басқа адамдардан да тапсырыс түсе бастады. Солай өнімдерім арқылы табыс табуға болатынын түсіндім. Қазір қосымша табыс көзі десем де болады.

— Құпия болмаса айына қанша тапсырыс аласың?

— Айына мынанша тапсырыс аламын деп айта алмаймын. Жұмыстан, басқа да шаруаларымнан қалатын уақытқа байланысты қарап көремін. Үлгеруге тырысамын. Кейде бір бұйымды «əне бітірем, міне бітірем» деп отырып, таңды атырып жіберемін. Сосын тəулік бойы ұйқысыз жүруге тура келетін кез болады. Бірақ, шаршамаймын, керісінше миым тынығып, сергіп қаламын.

— Әшекей бұйымдарды жасауда фантазия қаншалықты бай болуы керек?

— Енді, әшекейдің материалдарын алдымен арнайы фурнитура дүкендерінен іздеймін. Бір тас ұнап қалса, акцентті соған бере отырып, қандай əшекей жасауға болатынын елестетемін. Миымда бірнеше нұсқа пайда болып, біреуін таңдаймын. Соған сай сосын басқа да тастарды таңдаймын. Көп клиенттер бұйымдарымның эскизін сұрайды. Ал менің эскизім миымда тұрады ғой.
Шығармашылық адамдарының бəрінде бола ма, білмеймін, шабыт деген дүние бар. Шабытым бір ашылса, 2-3 күн бойы тоқтамастан 10-20 шақты бұйым жасап тастаймын. Соны «Инстаграм» әлеуметтік желісінен көргендер сатып алады. Содан кейін шабыт басылады. Біраз уақыт қолөнерге мүлде жақындамай кетем. Бір-екі аптаға созылады. Тапсырыс та алмай қоятын кез болады. Бірнеше күннен соң қайтадан шабытым ашылып, солай-солай жалғасады. Хобби болғандықтан шығар, тұрақты түрде жасамаймын.

— «Эльвираның әшекейін сатып алдым» дейтін бренд-бутикті қашан көреміз?

— Жоспарым көп, тек жүзеге асыруға мотивация жетіспей жүр. Әйтпесе, өзіңіз айтқандай бутигімді ашып алатын уақыт жетті негізі.

Жансая СЫДЫҚБАЙ

2015 жылғы 16 наурыз бен 5 қазан аралығында еліміздің шалғай елді мекендерінде тұратын 12432 азамат арнайы жұмылдыру топтарының құрамында ауылдарға барған Зейнетақы төлеу жөніндегі мемлекеттік орталығының, «Қазпошта» АҚ және халыққа қызмет көрсету орталықтары мамандарынан зейнетақы және жәрдемақы тағайындау жөнінде кеңестер алды.

Ауыл тұрғындарына мемлекеттік қызметтерді көрсету үшін аталған ұйымдардың 830 қызметкері жұмылдырылды. Атқарылған жұмыс қорытындысында жүгінген 12432 азаматтың 8078-і түрлі әлеуметтік төлемдерді рәсімдеу бойынша кеңес алды, 2305 адамнан деректемелерді өзгерту жөнінде өтініштер қабылданды, 2049 ауыл тұрғыны зейнетақы және жәрдемақы тағайындауға құжаттарын тапсырды.

Ағымдағы жылғы 16 наурыз бен 5 қазан аралығында жұмылдыру топтары еліміздің барлық өңірлерінде 3691 шалғай ауылдық округті қамтып, оларға 6341 рет барды.

Зейнетақы және жәрдемақы тағайындау жөніндегі барлық өтініштер бойынша электрондық іс макеттері жасақталып, өкілетті органның қарауына жіберілді. Ағымдағы жылғы 5 қазандағы жағдайы бойынша 2024 өтініш берушіге зейнетақы және жәрдемақы тағайындалды. Зейнеткерлік куәліктер және хабарламалар азаматтарға жұмылдыру топтарының келесі сапарларында жеткізілетін болады.

Жұмылдыру топтарының жұмысы пилотты режимде жылдың соңына дейін созылады. Тұрғылықты жері бойынша қызмет алушыларға қызмет көрсету (құжаттарды қабылдау және шот ашу) мемлекеттік қызметті алу уақытын және шығындарды төмендетуді, қолайлылықты, оңайлатылған тәртіпті қамтамасыз етеді.

Бұған дейін хабарланғандай, ағымдағы жылғы 12 наурызда «Зейнетақы төлеу жөніндегі мемлекеттік орталық» РМҚК, «Қазпошта» АҚ және «Халыққа қызмет көрсету орталығы» РМК арасында Өзара түсіністік және ынтымақтастық туралы меморандумға қол қойылды. Аталған құжат «Әлеуметтік-еңбек саласындағы мемлекеттік қызметтерді оңтайландыру және автоматтандыру мәселелері жөніндегі Қазақстан Республикасының кейбір заңнамалық актілеріне өзгерістер мен толықтырулар енгізу туралы» ҚР Заңын іске асыруға бағытталған.

mzsr.gov.kz 

Мемлекеттік қызметтің жаңа стандарттары күшіне енді.

Бизнес үшін әкімшілік кедергілерді азайту шеңберінде ҚР ИДМ Техникалық реттеу және метрология комитеті көрсетілетін мемлекеттік қызметтің стандарттары қайта қаралып, бекітілді.

Көрсетілетін қызмет бойынша өлшем құралдарының типін бекіту туралы сертификат алу үшін құжаттар топтамасы 8-ден 3-ке дейін қысқартылды, қызмет көрсету мерзімі 20 жұмыс күнінен 15 жұмыс күніне, метрологиялық аттестаттау туралы сертификат алу үшін құжаттар топтамасы 7-ден 2-ге дейін, қызмет көрсету мерзімі 20 күннен 15 жұмыс күніне қысқартылды, сонымен қатар мемлекеттік басқару органдарының метрологиялық қызметтерінің, жеке және заңды тұлғалардың қызметті жүзеге асыру жөніндегі нормативтік құжаттарды келісу мемлекеттік көрсетілетін қызмет мерзімі 20 күннен 5 жұмыс күніне дейін қысқартылды.

Осымен қатар, Қазақстан Республикасы Үкіметінің қаулысымен көрсетілетін үш мемлекеттік қызметті 2016 жылдан бастап Халыққа қызмет көрсету орталықтары арқылы көрсетуді көздейтін толықтырулар қабылданды.

Бүгінгі күні көрсетілетін қызметтер: сарапшы-аудиторларды аттестаттау, мемлекеттік рәміздерді дайындауға арналған лицензия беру электрондық портал арқылы көрсетіледі, бұл мемлекеттік қызметті алушының жеке кабинеті арқылы жүгініп, мемлекеттік көрсетілетін қызмет нәтижесін алуға мүмкіндік береді.

Сонымен қатар, көрсетілетін қызметтерді пайдаланушылар үшін www.memst.kz сайтында қызметтердің тізбесі, рұқсат беру құжаттарының паспорттары орналастырылған.

mid.gov.kz

Фармацевтика саласына 64,7 млрд. теңге инвестиция тартылып, 15 инвестициялық жоба жүзеге асады. Атқарылар жұмыстың бәрі индустриаландырудың екінші бесжылдығында істелетін болады деп хабарлайды mid.gov.kz.

2010-2014 жылдары Индустриаландыру картасы аясында 39,5 млрд. теңге инвестиция тартылды, 25 жоба іске қосылды.

«АбдиИбрахимГлобалФарм» ЖШС БК, «Бирунифарм» ЖШС және МедикалФарм «Ча-Кур» ЖШС жобларын 2015 жылдың қазанында іске қосу жоспарланған. Аталған жобаларға жалпы көлемі 5,4 млрд. теңге инвестиция тартылады.

2015 жылы қаңтар-наурыз аралығында фармацевтика саласындағы кәсіпорындарға тартылған тікелей шетелдік инвестиция көлемі 6,6 млн. АҚШ долларына тең. Биыл өткен жылмен салыстырғанда аталған көрсеткіш 2,1 есе өсті.

Фармацевтика саласына Pfizer (АҚШ) сияқты алпауыт компанияны Алматы облысында вакцина өндірісіне, ал Қарағанды облысында таблеткалар өндіру жобасына Sanofi (Франция) компаниясын тарту бойынша белсенді жұмыс жүріп жатыр. Мысалы, Иорданияның HIKMA трансұлттық фармацевтика компаниясы елімізде қант диабеті мен ОЖЖ сырқатын емдеу үшін дәрі-дәрмек өндірісін қолға алуды және Алматы қаласында антибиотиктер шығаруға ынта білдіріп отыр. Шамамен 11 млрд. доллар инвестиция тартып, 300 жаңа жұмыс орнын құру көзделген.

Геннадий Головкиннің бокс қолғабы қайырымдылық аукционына шығарылды.

Саудадан түскен қаражат кикбокстан әлемнің вице-чемпионы Азамат Нұрпейісовті емдеуге жұмсалады.

Бәссауданы «Астана» мейірімділер клубының» негізін қалаушы Гүлмира Әбдірашева ұйымдастырып отыр. Оның айтуынша, Головкиннің қолғабын боксшының менеджері Олег Герман жіберіпті. Ал Геннадий Азамат Нұрпейісовтің ертерек жазылып кетуін тілепті.

Лоттың бастапқы бағасы – 30 000 теңге. Бәссауда Әбдірашеваның Instagram әлеуметтік желісіндегі жеке парақшасында өтеді. Қолғапты сатып алған адам ақшаны тікелей Азамат Нұрпейісовтің шотына жібереді, содан кейін ғана қолғапты алып кете алады.