Jas.kz — Страница 71 — Жақсы Ақпараттар Сайты

Елордада үздік сынып жетекшілері анықталды

-

14.10.2016

Елордада үздік сынып жетекшілері анықталды

ҚР Тәуелсіздігінің 25 жылдығын мерекелеу аясында Төлеген Айбергенов атындағы №16 орта мектепте «Ең үздік сынып жетекшісі» жалпы мектепішілік конкурсы өтті. Байқауда 11 сынып жетекшісі бес номинацияда сайысқа түсті, деп хабарлайды қалалық әкімдіктің баспасөз қызметі.

Бірінші кезеңде сынып жетекшілері «Менің педагогикалық ұстанымым» тақырыбында эссе жазып, сынып туралы жарнамалық кітапшаларын таныстырды.

Келесі номинацияда педагогтар ашық сынып сағаттарын өткізді. Бұл олардың оқушылармен өзара сыйластық қатынас құру, әрбір оқушыны тақырыпты талқылауға тарта білу қасиеттерін көруге мүмкіндік берді. Бағалау кезіндегі басты критерий сабақтың мазмұны, оны өткізу әдістері мен нысаны болды. Конкурс барысында қатысушылар «Сынып жетекшісінің өмірінен бір күн» бейнеролигінің авторы атанды. Бұдан басқа, сынып жетекшілері өз шығармашылық өнерлерін ортаға салды.

«Ең үздік сынып жетекшісі» байқауының Гран-приі мен «Ең үздік сынып жетекшісі» атағы Гулистан Уринбасароваға бұйырды.

Бірінші орынды Сымбат Омарова мен Айгүл Долапова өзара бөлісті. Аяулым Ахметбекова екінші, Роза Акиярова үшінші орында.

Қалған қатысушылар номинант атанып, грамоталармен және бағалы сыйлықтармен марапатталды.

Конкурс оқушыларды тәрбиелеудің инновациялық әдістерін анықтау, кәсіби даму, шығармашыл сынып жетекшілеріне қолдау көрсету мақсатында өткізілді.

ОҚО-дағы «Бал Текстиль» кілем шығару фабрикасы халықаралық «Алтын жұлдыз» үздік сапасын иеленді

Клара Ермағамбетова

-

14.10.2016

0

ОҚО-дағы «Бал Текстиль» кілем шығару фабрикасы халықаралық «Алтын жұлдыз» үздік сапасын иеленді

Оңтүстік Қазақстан облысынан шығарылатын отандық өнім — «Бал Текстиль» кілемдері Швейцарияның Женева қаласында өткен халықаралық конвенцияда үздік сапа аталымы бойынша «Алтын Жұлдыз» (ISAQ жүлдесі) иеленді. деп хабарлайды ОҚО әкімінің баспасөз қызметі.

Сапа мен инновациядағы жетістіктерге қол жеткізген компаниялар мен ұйымдарға табысталатын ISAQ жүлдесін алу сынында кілем фабрикасы көшбасшылық пен ұйымдастырушылық қабілеті, сапа мен өнімділік, компанияның беделі мен нарықта тауар сатуға қолайлы орта қалыптастыруы, технология, инновация және өсім сатылары бойынша жеңіске жетіп, үздік деп танылған. Ал құрметті халықаралық жүлдені отандық компанияның жетекшілігіне табыстаған соңғы 30 жылдан бері әлемнің 179 елінде әр саланың көшбасшыларын анықтап, марапаттап келе жатқан «Business Initiative Directions» компаниясы болып табылады.

«Бал Текстиль» кілем фабрикасы, әзірге, Қазақстанда теңдесі жоқ серіктестік болып табылады. Өз жұмысын 2013 жылы «Индустрияландыру картасы» бағдарламасы аясында бастаған бұл өндіріс орны тек кілем тоқумен ғана емес, «BCF», «Heat-Set», «Frize» маркалы полипропилен жіптерін иірумен де айналысуда.

Қажетті шикізат Түркия, Бангладеш, Үндістан және басқа да елдерден тікелей жеткізіледі. Кілемдер Бельгиялық жоғары технологиялық «Michel Van De Wiele» қондырғыларда тоқылады. Ал синтетикалық полипропилен жіптері Германия мен Франция елдерінен жеткізілген. «Oerlikon Neumag», «Allma Volkmann», «SUPERBA» фирмаларының заманауи құрылғыларында иіріледі.

«Бал Текстильдің» кілем және кілем өнімдерін шығару қуаттылығы – жылына 5 млн. шаршы метрден астам. Ал, полипропилен жібін иіру қуаттылығы – жылына 4000 тоннаны құрайды. Бүгінде мұнда 245 адам жұмыспен қамтылған.

«Бал Текстиль» өнімдерін Қазақстанның барлық қалаларында кездестіруге болады. Еліміздегі ресми таратушылардың қатары 400 ден асқаны – осының дәлелі. Сонымен қатар, тұрақты түрде тапсырыс беріп, өнімдерді алатын 20-дан астам шетелдік серіктестері бар.

2016 жылы «Бал Текстиль» шведтік ИКЕА мен ЕЭС-тің өзге де компанияларымен келісімге келудің нәтижесінде, экспорт көлемін 20-30 пайызға ұлғайтты. Енді «Қазақстанда жасалған» деген белгісі бар кілемдерді Англия, Германия және Ресейдің ірі сауда маркеттерінен кездестіруге болады.

Сайын Мұратбековті еске алу кеші өтті

Клара Ермағамбетова

-

14.10.2016

0

Қазақ әдебиетінің классик жазушысы, Мемлекеттік сыйлықтың лауреаты Сайын Мұратбековтің туғанына 80 жыл толуына орай Талдықорған қаласындағы І. Жансүгіров атындағы Мәдениет сарайында «С. Мұратбеков прозасы – алтын ғасыр әдебиетінің маржаны» атты еске алу кеші өтті. Жиынға Қазақстан Жазушылар одағының төрағасы Нұрлан Оразалин бастаған бір топ әдебиет қайраткерлері қатысты.

Жиын «Жетісу» телеарнасы дайындаған жазушы туралы фильм көрсетуден басталды.

Мерейтойға жиналған қауымды облыс әкімінің бірінші орынбасары Лаззат Тұрлашов құттықтады.

— Сайын Мұратбеков осы өлкеде туып – өсіп, қалың қазақтың ортақ мақтанышына айналған жазушы. Елін, жерін сүйіп, аялай білген азаматқа деген халқының пейілі, ықыласы ерекше. Бүгін ортамызда өзі болмаса да, жазған еңбектері қазақ әдебиетінің алтын қорында сақталып, жастарға үлгі-өнеге болып қалары анық. Халқымыздың өшпес өнерін насихаттайтын, кейінгі жастарға тағылым болатын осындай шараларымыз жалғаса берсін! Ағамыздың ұрпақтарына құт-береке, ырыс пен бақыт, барша жетісулықтарға табыс, берекелі өмір тілеймін! – деді Л. Тұрлашов өз сөзінде.

Мұнан кейін Қазақстан Жазушылар одағының төрағасы, Мемлекеттік сыйлықтың иегері Нұрлан Оразалин жазушының болмысы, мінезі, тазалығы, таланты туралы ерекше тебірене сөйледі. Сайын Мұратбековке алдындағы аға буыны салмақты баға берген, әңгіме жанрындағы шеберлігіне тәнті болғаннан «қазақтың Чеховы» деп атаған сәттерін де сүйсіне еске алып, қазақ прозасына құбылыс болып келген жазушының мұрасы мәңгілік екенін қадап айтты.

Сондай-ақ еске алу кешінде жазушылар Бексұлтан Нұржекеев, Ахметжан Ашири, Кәдірбек Сегізбайұлы және т.б. қаламгерлер сөз алып, Сайын ағаның шығармашылық белестері туралы әңгімеледі.

Жиын соңында театрландырылған көрініс сахналанып, Сүйінбай атындағы облыстық филармония әртістерінің мерейтойға арналған концерті көрсетілді.

Биылғы өнімнен алғашқы қант алынды

Клара Ермағамбетова

-

14.10.2016

0

Биылғы жиналған өнімнен Көксу қант зауыты осы маусымның алғашқы қантын алды. Зауыт ұжымын осы маңызды оқиғамен құттықтауға облыс әкімі Амандық Баталов арнайы барды, деп хабарлайды Алматы облысы әкімінің баспасөз қызметі.

Көксу қант зауытының жаңғырту жұмыстары мен жеткен жетістіктері туралы кәсіпорынның құрылтайшысы Нұрлан Тілеубаев баяндап берді.

— Биылғы жылы миллиард теңгеден астам қаржы құйып, кәсіпорынға жаңғырту жұмысын жасадық. Қазір барлық жүйелер автоматтандырылған, процестердің бәрі де бір оператордан басқарылады. Сонымен қатар фильтрлер ауыстырылып, бұл өз кезегінде өнімділікті көтеруге және электр энергиясының тұтыну мөлшерін азайтуға ықпал етті. Бұл біздің жұмысымыздың алғашқы кезеңі ғана, зауыттың жаңғырту жұмыстары келесі жылы да жалғастырылатын болады, — деді Н. Тілеубаев.

Облыс әкімі Амандық Баталов оператор бөлмесін, өңдеу цехын аралап, дайын өнімді көрді. Мұндай жақсы көрсеткішке мемлекет қолдауының арқасында және қызылшашылар мен қант зауыты өкілдерінің бірлескен жұмысының нәтижесінде қол жеткізілгенін атап өтті.

— Бүгін біз биылғы жылдың алғашқы қантын алдық. Бұл — біз үшін аса маңызды оқиға, ұзақ та қажырлы еңбектің көрсеткіші. Өзара ынтымақтаса атқарған жұмыстың нәтижесінде Алматы облысында биылғы жылы 6800 гектарға қант қызылшасы себілді. Шамамен 240-250 мың тонна өнім жинаймыз деп жоспарлап отырмыз. Одан мөлшері 24-25 мың тонна қант алынады. Бұл – жақсы көрсеткіш. Егіс айналымының талаптарын ескере отырып, қызылша алқабының көлемін жылдан жылға арттыратын боламыз. Яғни алынатын қант көлемі де өседі деген сөз. Өңдеу жұмысы кедергісіз жүру үшін алдағы уақытта Қарабұлақ, Алакөл, Ақсу қант зауыттарын да іске қосуды жоспарлап отырмыз. Қабылданған кешенді шаралар Мемлекет басшысының халықты отандық қантпен қамтамасыз ету туралы тапсырмасын абыроймен орындауға серпін береді деп ойлаймын. Ішкі қажеттілікті өтегеннен кейін одан әрі біз өнімімізді экспортқа шығаруға талпынатын боламыз, — деді облыс әкімі Амандық Баталов.

Өңір басшысы А. Баталов Н. Тілеубаевтың ұсынысы бойынша келесі жылы мемлекеттік-жекеменшік әріптестік негізінде қант қызылшасын өсіретін аудандарда облыс әкімдігінің көмегімен қант қызылшасын қабылдайтын пункттер ашылатынын айтты. Онда зауыт құрылтайшылары зертхана мен өлшеу құрылғыларын орнатпақшы. Қызылша өсірушілер өсірген тәтті түбірді қабылдау пунктіне әкеліп тапсырады, ал құрылтайшылар оны зауытқа өз күштерімен жеткізеді. Есептесу жергілікті жерде сол мезетте жүргізіледі. Сонымен қатар Көксу ауданындағы қабылдау пунктінде қабылдау ісін жылдамдатуға мүмкіндік беретін германиялық құрылғы қойылатын болады.

Зауытқа өнім әкелген шаруалар қант қызылшасын өсіру мен өткізу ісін жеңілдету бағытында енгізіліп жатқан жаңалықтарды естіп, ризашылықтарын білдірді.

Қазақ балалары да робот жасай алады

Білім

asaubota

-

13.10.2016

1

Таяу күндері Астанадағы Халықаралық мектепте робототехникадан республикалық Олимпиада өтті. Білім және ғылым министрлігі мен «Назарбаев Зияткерлік мектептері» дербес білім беру ұйымы бірлесе ұйымдастырған шараға еліміздің жалпы білім беретін ордалар мен Назарбаев Зияткерлік мектептерінің аймақтық жарыс кезеңдерінің 184 жеңімпаз оқушысы қатысты.
Ұйымдастырушылардың айтуларынша, шараның негізгі мақсаты – оқушылардың ғылым мен техниканың өзекті салаларына назарларын аудару, заманауи ғылыми-техникалық бағытта шығармашылықтарын дамыту, білім беру процесінде робототехниканың оқу бағдарламаларын табысты жүзеге асыру.

Айта кетейік, жарыс робототехниканың халықаралық Олимпиадасының (Word Robot Olympiad – WRO) ережелеріне сәйкес өткізілді. Жүлделі орындарға ие болған командалар серіктес Microsoft, Lego, Dr. WEB компанияларынан бағалы сыйлықтар алды. Енді республикалық сайыс жеңімпаздары қараша айында Делиде (Үндістан) өтетін халықаралық Олимпиадада ел намысын қорғайтын болады.

Бұл олимпиаданың 12 жылдық тарихы бар. 2004 жылдан бүгінге дейін әлемнің 50-ден астам елінде өткізілген білім жарысына 20 мыңнан астам команда қатысыпты. Ал елімізде өткізілген жарыстарға 2014 жылы 100 команда, 2015 жылы 115 команда атсалысқан.

Әр елде Олимпиаданың қорытынды кезеңін өткізумен ұлттық ұйымдастырушылар айналысады. Word Robot Olympiad шешімімен Қазақстандағы ұлттық ұйымдастырушы болып «Назарбаев Зияткерлік мектептері» дербес білім беру ұйымы бекітілген. Бүгінде НЗМ жалпы білім беретін мектептерге робототехниканы енгізу үшін 80 жаттықтырушыны даярлап, еліміздің 2500 мұғаліміне робот жасаудың қыр-сырын үйретуді қолға алды. Еліміздегі кей мектептерде робототехника үйірмелері ашылып, оқушылар робототехника саласымен жете танысуы басталып та кеткен. Демек, мектеп қабырғасында жүріп, робот жасауды меңгерген шәкірттердің алдында ғылыммен айналысу мүмкіндіктерінің ашылары сөзсіз.

Еске сала кетсек, «Робототехника» – математика, физика, информатика, технология, инженерия және тағы басқа да пән негіздерін бірлестіретін пәнаралық элективті курс. Бұл курс логикалық ойлауға, әр оқушының дербес негізде техникалық өнім моделін құрастыру дағдыларын дамытуға, оқушыларға жаңа үлгідегі 21 ғасырдың техника мен технологияларымен танысуларына мүмкіндік береді. Келесі жылғы Олимпиаданы EXPO-2017 көрме базасында өткізу жоспарланып отыр.

«Біз үш жыл қатарынан Олимпиада өткізіп жатырмыз. Бұл шара тұңғыш рет Қазақстанда 2014 жылы ұйымдастырылды. 11 қыркүйекте өңірлік кезеңдер өткізілді. Онда робототехника саласы бойынша үздік оқушылар іріктеліп алынды. Республикалық сайыста қатысушылар жас бойынша 8 санатқа бөлінді. Олардың жасы 9-дан 25 жасқа дейін», – дейді Олимпиаданың бас қазысы Азамат Биданов.

Оның айтуынша, жыл өткен сайын Олимпиаданың тақырыбы өзгеріп отырады. Биылғы жылдың тақырыбы – қалдықпен күресу. Қатысушылардың барлық жұмысы осы салаға арналады. Мәселен, қалдықтарды реттеу мен өңдеу жөнінде жұмыстар ұсынылатын көрінеді.

Рас, Қазақстан үшін робототехника өте жас сала. Мысалы, Жапония, АҚШ, Германия сияқты робототехника саласындағы жетік елдер сондай биік дәрежедегі өндіріске ондаған жыл бойы тынымсыз еңбектеніп жетті. Қазіргі кезде бұл елдерде робототехника саласы қарқынды дамып келеді және Қазақстаннан робототехника бойынша 10-20 жылға озып отыр. Германияның Kuka AG, Жапонияның Kawasaki Robotics индустриалды роботтарды шығаратын компаниялары соған мысал.
Жас мемлекетіміз үшін бұл кемшілік саналмасы белгілі. Қай салада болмасын талай межені бағындыруға талпынған еліміз робототехника саласын да жете меңгеріп, келешекте қазақ балалары арасынан да мықты ғалымдар шығып жатса, таңғалуға болмайды. Өйткені, Білім және ғылым министрлігінің ерекше көңіл бөлуінің арқасында бүгінде оқушыларымыз біршама белесті бағындырып та үлгерді.

Ендеше, бұл – адам өмірін жеңілдетуге арналған роботтарды күнделікті өмірде қолданатын уақыт жақындап келе жатыр деген сөз.

Айша БЕКҚЫЗЫ

ОҚО-да «Ырыс» қаржы ұйымы арқылы «Жұмыспен қамту 2020» бағдарламасы аясында 1003 жоба қаржыландырылған

Клара Ермағамбетова

-

13.10.2016

0

ОҚО-да «Ырыс» қаржы ұйымы арқылы «Жұмыспен қамту 2020» бағдарламасы аясында 1003 жоба қаржыландырылған

Бұл туралы бүгін ОҚО аймақтық коммуникациялар орталығында өткен баспасөз брифингінде мемлекеттік «Жұмыспен қамту 2020» жол картасы бағдарламасы аясында өңіріміздегі «Ырыс» микроқаржы ұйымының директоры Хилола Назарметова мәлімдеді. 2011-2015 жылдар аралығында аталған бағдарлама аясында қаржыұйымы 1003 жобаны 2,1 млрд.теңгеге қаржыландырды, деп хабарлайды ОҚО әкімінің баспасөз қызметі. Оның ішінде мал шаруашылығы бойынша 1,8 млрд. теңгеге 888 жоба; егін шаруашылығы бойынша 106,5 млн.теңгеге 44 жоба; ал әр түрлі қызмет түрлері бойынша 150 млн. теңгеге 71 жоба жүзеге асырылған.

«Биыл аталған бағдарлама бойынша облысымызға 7,0 млрд.теңгеден астам қаражат бөлініп, оның 3,8 млрд.теңгесі «Ауылшаруашылығын қаржылай қолдау қоры» арқылы таратылды. Ол жерде кәсіпкерлерге ең жоғарғы сома 3,0 млн.теңгеге дейін берілді»,- деді Х.Назарметова.

Айта кетейік, қаражатты алуға ниет білдірген азаматтар ең алдымен «Жұмыспен қамту 2020» жол картасы бағдарламасының талаптарына сай келу керек. Берілетін несиенің максималды сомасы 6,0 млн.теңге, жылдық сыйақысы 7%, 54 айға дейін беріледі. Ал несие алушыларға қойылатын талаптары ретінде, бизнесті (жобаны) іске асыратын орнының болуы, несие тарихының таза және соңғы 12 ай ішінде төлемі кешіктірілген несиесі болмауы шарт.

ОҚО-да Қаржы және бюджет комитетінің көшпелі отырысы өтті

Клара Ермағамбетова

-

13.10.2016

0

ОҚО-да Қаржы және бюджет комитетінің көшпелі отырысы өтті

Бүгін Оңтүстік Қазақстанда ҚР Парламенті Мәжілісінің Қаржы және бюджет комитетінің көшпелі отырысы өтті. Онда аталған комитеттің төрайымы Гүлжан Қарақұсаваның төрағалығымен «бюджетаралық реттеудің негізгі функцияларының бірі ретінде өңірдің бюджеттік қамтамасыз етілуін теңестіру және салықтық әлеуетінің өсуін ынталандыру» мәселесі қаралды.

Көшпелі жиынға Қаржы министрлігінің мемлекеттік кіріс комитетінің төрағасы Д.Ерғожин мен ҚР Парламенті Мәжілісінің 12 депутаты және облыстық мәслихат депутаттары қатысты.

Отырысты ашып берген облыс әкімі Жансейіт Түймебаев көшпелі жиынның маңыздылығына тоқталып, жұмысына сәттілік тіледі.

«Бүгінгі отырыста талқыланатын мәселе өте маңызды, себебі өңіріміздің бюджеті республика бойынша ең үлкен бюджет. Тек соңғы 7 жылда облыс бюджеті 2,5 есеге өсіп 559 млрд. теңгеге жетті. Осыған орай, біздің басты міндет бюджеттен жұмсалған әр теңгенің облыс экономикасына тигізетін әсерінің нәтижелі болуын ұйымдастыру. Себебі, бюджет қаражаты есебінен облыс халқының көптеген әлеуметтік-экономикалық маңызды мәселелері шешіледі», — деді аймақ басшысы.

Жиында баяндама жасаған комитет мүшесі Омархан Өксікбаев бюджетаралық қатынастарды ұйымдастыруды жақсарту, сондай-ақ оларды одан әрі жетілдіру бағыттарын дұрыс таңдауды қамтамасыз ету – біздің ортақ жұмысы екенін жеткізді.

«Бюджетаралық қатынастар — өңірдің әлеуметтік-экономикалық дамуын басқару құралдарының бірі, сондықтан олар өңірдің даму мақсаттарымен және міндеттерімен үйлесімді болуға тиіс. Бюджетаралық қатынастардың қалыптасқан жүйесінде бір нәрсені өзгерту үшін салмақты дәлелдер мен оны өзгерту бойынша ұсыныстар қажет», — деді О.Өксікбаев.

Сонымен қатар, күн тәртібінде облыс әкімінің орынбасары Е.Садыр сөз алып, өңіріміздегі бюджеттің атқарылу барысы туралы баяндады. Айтуынша, 2014-2016 жылдарға республикалық бюджеттен жалпы 765,7 млрд. теңге, оның ішінде 2014 жылы — 254,7 млрд. теңге, 2015 жылы — 255,2 млрд. теңге, 2016 жылы — 255,8 млрд. теңге көлемінде субвенция бөлінген.

Айта кетейік, бюджетті жоспарлау мен орындау механизмдерін тұрақты жетілдіру нәтижесінде облысымызда Егемендік алған жылдардан бері, 1491 мектепке дейінгі ұйымдар ашылып, балаларды мектепке дейінгі біліммен қамту деңгейі 14%-дан 83,3%-ға жетті. Сондай-ақ, осы жылдарда облысымызда 444 жаңа мектептер салынып, 117 аппатты мектептердің мәселесі шешілді. Денсаулық сақтау саласында 347 жаңа нысандар пайдалануға берілді. Бұдан бөлек, облысымызда 8,9 млн. шаршы метр тұрғын үй пайдалануға беріліп, 100 мыңнан астам отбасы баспаналы болды. Сонымен қатар, орталықтандырылған сумен қамту 51,9%-дан 71,3%-ға және газбен қамту – 33,1%-дан 57,2%-ға жетті. Ерекше көңіл бөліп айтатын мәселе, өңіріміздің экономикасына бюджет есебінен көрсетілген қолдау нәтижесінде жұмыссыздық деңгейі 11,4%-дан 5,2%-ға төмендеді. Сонымен қатар, мұғалімдердің, денсаулық сақтау және жалпы алғанда барлық бюджеттен қаржыландырылатын мекеме қызметкерлерінің еңбекақысы көбейді.

VIII Халықаралық ғылыми-тәжірибелік конференция «Білім берудегі өзгерістер аясын кеңейту: апробация мен тарату»

Білім

Клара Ермағамбетова

-

13.10.2016

0

VIII Халықаралық ғылыми-тәжірибелік конференция «Білім берудегі өзгерістер аясын кеңейту: апробация мен тарату»

2016 жылы 27-28 қазан күндері «Назарбаев Зияткерлік мектептері» дербес білім беру ұйымы «Астана қаласындағы Халықаралық мектеп» филиалының негізінде «Білім берудегі өзгерістер аясын кеңейту: апробация мен тарату» атты VIII Халықаралық ғылыми-тәжірибелік конференциясын өткізуді жоспарлауда.

Конференцияның мақсаты — мұғалімдер, зерттеушілер, әлеумет пен Қазақстанның білім беру саласына позитивті тәжірибені бейімдеу мен тарату саясатын әзірлеушілер арасында ұтымды диалог құру. Конференцияға 700-ден астам адам қатыспақ.

Конференция жұмысына білім беру саласында саясат тарату және реформалауда елеулі тәжірибесі әрі озық идеялары бар сарапшылардың қатысуы жоспарлануда.

Пленарлық отырыстың бірі Қазақстан Республикасы Тәуелсіздігінің 25 жылдық мерейтойына арналады. Онда қазақстандық білім беру жүйесінің дамуына қатысты сұрақтар турасында білім беру саласының халықаралық және отандық мамандары ретроспективті талқылаулар жүргізетін болады.

Конференция жұмысы нәтижелері бойынша үздік болып танылған қатысушылар баяндамалары электрондық мақалалар жинағына шығарылады.

Шара аясында өткізілетін білім беру ресурстары көрмесінде қатысушыларының назарына отандық және шетелдік баспалардың және ұйымдардың үздік өнімдері ұсынылатын болады.

Конференция туралы толық ақпаратпен http://conferences.nis.edu.kz конференция сайтына өту арқылы немесе conference@nis.edu.kz электрондық поштасына хат жіберу арқылы танысуға болады.

edu.gov.kz

«Үздік мектепке дейінгі ұйым» республикалық конкурсын өтеді

Білім

Клара Ермағамбетова

-

13.10.2016

0

«Үздік мектепке дейінгі ұйым» республикалық конкурсын өтеді

Мектепке дейінгі білім беру жүйесінің жаңартылған мазмұнын іске асыру аясында балаларды тәрбиелеу, дамыту және оқыту бойынша озат тәжірибені анықтау және оны тарату мақсатында биылғы қазан айында «Үздік мектепке дейінгі ұйым» республикалық байқауы өткізілмек, деп жазады ҚР БҒМ баспасөз қызметі.

Конкурсқа мемлекеттік аттестаттаудан өтіп, заң бұзушылықтарға жол бермеген, байқаудың аймақтық кезеңінен өткен, меншік түрі мен ведомстволық бағыныстылығына қарамастан, барлық түр және типтегі мектепке дейінгі ұйымдар қатыса алады.

Конкурстың қорытындылары «Мектепке дейінгі балалық шақ» республикалық орталығының www.rc-dd.kz сайтында жарияланады.

Астанада конькимен жүгірушілер арасында жарыс өтіп жатыр

Клара Ермағамбетова

-

13.10.2016

0

Астанада конькимен жүгірушілер арасында жарыс өтіп жатыр

«Алау» мұзайдыны сарайында конькимен жүгіруден ел Кубогы өтіп жатыр. Бұл турнир спортшылар үшін маусымның ресми ашылуы деп саналады және 26-28 қазанда өтетін Қазақстан чемпионатына дайындық кезеңі болып табылады. Біріншілікте ел құрамасына кіретін және Әлем кубогына қатысатын спортшылар анықталады, деп жазады қалалық әкімдіктің баспасөз қызметі.

Жарыстың алғашқы күні елордалық спортшылар үш алтын мен бір қола медаль еншіледі. Надежда Сидельник 500 метр қашықтықта топ жарса, 3 км жүгіруде «қола» олжалады.

Ерлер арасындағы командалық жарыста астаналық спортшылар Дмитрий Морозов, Демьян Гаврилов, Артур Галиев топ жарды. Әйелдер арасындағы спринтте де елордалықтар көш бастады. Мұнда Надежда Сидельник, Маргарита Артемьева, Екатерина Брынза жеңіске жетті.

Чемпионат 14 қазанға дейін жалғасады, бүгін қатысушылар үш, ертең екі қашықтықта сайысқа түседі.

— 2011 жылдан бері елордада конькимен жүгіру спорты белсенді дамып келеді. Спортшыларымыз жақсы нәтижелер көрсетуде. Өткен спартакиадада екінші орын алдық. Бүгін әр түрлі жастағы конькимен жүгірушілер жарысып жатыр. Біздің командадағы ең үлкен спортшы 20 жаста. Әлі де медаль аламыз және спортшыларымыз Әлем кубогында өнер көрсетеді деп үміттенемін, — дейді Астана қаласының конькимен жүгіру спортынан бас жаттықтырушы Владимир Костин.

Айта кетейік, конькимен жүгіру спортынан Әлем кубогының үшінші кезеңі 2-4 желтоқсанда Астанада өтеді.