Jas.kz

 «Транстелеком» АҚ Қазақ хандығының 550 жылдығына орай жастар арасында «Компания келбеті» атты фотобайқау жариялайды.

 Байқау шарттары: байқауға жасы 25-тен аспаған жастар қатыса алады. Ол үшін, ниет білдіргендер, өзінің портретті суреттерін Компанияның электронды поштасына «Компания келбеті» деген хат тақырыбымен жолдауы керек. Суреттер қазан айының соңғы күніне дейін қабылданады. Қабылдау уақыты аяқталған соң, арнайы құрылған комиссия жеңімпаздарды анықтайды. Фотобайқауда жеңіп шыққан бір жігіт пен бір қыз 3 жылға дейін Компанияны таныстыратын болады. Сондай-ақ жеңімпаздарға кәсіби фотографпен өзінің жеке фотосессиясын жасауға мүмкіндік беріледі.

Ал компания неліктен аталмыш байқауды Қазақ хандығының 550 жылдығына орайластырды деген сұраққа келетін болсақ, компания баспасөз хатшысы Аманбек Төлепбергеновтің айтуынша, таңдалған «Компания келбеті» ұлттық нақышта киінетін болады, осылайша бұл тек Компания келбеті емес, мемлекет келбеті болуы мүмкін.

«Соңғы күндері елімізде барлығы ұлттық тарих пен әдет-ғұрыпқа көп көңіл бөлуде. Дәл осы уақытта біз Компания тарихында алтын әріппен жазылатын өзіндік тарихымызды дәріптей аламыз», — деп түсіндірді компания баспасөз хатшысы.

Тағы бір айта кететін жайт, «Транстелеком» АҚ ЭКСПО-2017 көрмесіне арналған «Болашақ қала» интеграциялық жүйесін жасап жатқаны белгілі. Осыған орай, «Компания келбеті» болып таңдалған жастар ЕХРО-2017-де компанияны ғана таныстырып қоймай, жалпы қазақ дәстүріне де назар аудартатын болады.

«Еліміздің сырға толы дәстүрімізді келген қонақтарға паш етуде, бұл біздің кішкентай ғана үлесіміз болар деген ойдамыз», — деп қорытты өз ойын Аманбек Төлепбергенов.

bnews.kz

Павлодарда өткен Омбы күндері аясында көрші мемлекеттен жүзден астам кәсіпкер келді. Екі жақтың іскер азаматтары сауда-саттық байланысты дамытып, бірлескен кәсіпорындар ашу және дайын өнімді өткізу мәселелерін талқылады. Омбы кәсіпкерлері химия, мұнай-химия, отын-энергетика, құрылыс, көлік, қызмет көрсету, өңдеу және ауылшаруашылығы саласындағы өз мүмкіндіктерін көрсетті. Қабылдаушы тарап болса ішкі экономикалық ынтымақтастықты нығайтуда қарым-қатынастың жаңа түрін енгізіп, келісімдер биржасын ашты. Бизнес алаңында екі жақтың кәсіпкерлері бір-бірімен танысып, ақпарат алмасты. Келісімдер биржасы Павлодар мен Омбы арасындағы сауда-экономикалық әріптестіктің нығаюына септігін тигізеді.

24.kz

Астанада пәтерге құжат қабылдау 2015 жылғы 19-23 қазан аралығында жүргізіледі.

«Қазақстан ипотекалық компаниясы» ипотекалық ұйымы» акционерлік қоғамы 2015 жылғы қазанда Астана қаласында сатып алу мен жалға беру үшін мынадай объектілерден 256 пәтер қарастырып жатыр: Ақмола облысы, Целиноград ауданы, Қосшы кенті, Ә. Жангелдин көшесі мекен-жайында орналасқан «Академия» тұрғын үй кешенінен 95 пәтер; Астана қаласы, «Алматы» ауданы, Оңтүстік-Шығыс тұрғын үй алабы (сол жағы), Қобыланды батыр көшесі мекен-жайында орналасқан № 7 д, 7 г үйлерден 161 пәтер деп хабарлайды Астана қаласы әкімдігінің баспасөз қызметі.

Бүгін Жетісулықтар үшін ерекше күн! Ғарышты бағындырған еліміздің үшінші перзенті Айдын Айымбетов жерлестерімен жүздесу үшін өзінің туған жері Талдықорған шаһарына арнайы келді.

Облыс орталығы Талдықорған қаласының төріндегі «Жастар» спорт сарайында Ұлы дала елінің Батыры, Халық Қаһарманы, барша Алаш жұртының мақтанышымен қауышуға жиналғандардың қатары мол болды.

Қазақстанның көк байрағын ғарыш көгінде желбіретіп, аман-есен еліне оралған ғарышкерді Жетісулықтар атынан өңір басшысы Амандық Баталов құттықтады:

— Туған қалаңызға, жер жаннаты Жетісу жеріне қош келдіңіз! Қазақтың абыройын асырған Сіздей азаматтың Алматы облысында дүниеге келіп, білім алып, қызмет жасағандығы – біз үшін үлкен мақтаныш. 

Сіздің бала кезіңізден ғарышкер болуды армандап, Қазақ елінің туын ғарышқа алып шықсам деген балалық арманыңыз орындалды. Үстіміздегі жылдың екінші қыркүйегінде бәріміз Сіздің ғарышқа ұшқан тарихи сәтіңізге куә болдық, қатты қуандық, ерекше толқыдық. Көптің тілегі қабыл болып, аман-есен жерге оралдыңыз. Қарапайым қазақ баласының арманы орындалып, осы күнде Ұлы дала елінің мақтанышына айналдыңыз.  Кеше ғана Елбасының Жарлығымен «Халық қаһарманы» атағын табысталып, Айдынның космос кеңістігінде оннан аса ғылыми-тәжірибелік сынақтар жүргізгенін ерекше атап өтті.       

Сіздің отандық космос саласын дамытудағы еңбегіңіз — жастар үшін өнеге. Сіздің ғарышқа жасаған осы бір сапарыңыз арқылы біз бірлік пен ерліктің не екенін өскелең ұрпаққа көрсетіп, Отанды қалай сүю керектігін үйрететін боламыз, — деп сөзін түйіндеді.

Осыдан кейін Талдықорған қаласының әкімі Ермек Алпысов Айдын Ақанұлына Талдықорған жұртшылығы атынан тілек-лебізін білдіріп, «Талдықорған қаласының құрметті азаматы» атағын беріп, су жаңа темір тұлпардың кілтін сыйлады.

Өз кезегінде Айдын Айымбетов:

— Құрметті жерлестер! Өздеріңізбен амандықта қауышқандығыма қуаныштымын. Менің ғарышқа сапарымның ойдағыдай болуы бірінші кезекте Елбасының, одан кейін барша жерлестерімнің арқасында. Сол үшін баршаңызға үлкен алғысымды білдіремін. «Қазғарышта» жұмысымды жалғастыру арқылы Қазақстанның өсіп-өркендеуі жолында әлі талай еңбек ететіндігіме сөз беремін, —  деп сөзін қорытты.

Шара облыстың үздік шығармашылық ұжымдарының әзірлеген концерттік бағдарламасымен жалғасты. Осыдан кейін Айдын Айымбетов өзі білім нәрімен сусындаған № 14 орта мектепке барып, білім ордасының ұжымымен жүздесті. Ақ пейіл мен ынтымақтың белгісі ретінде мектеп оқушылары аспанға ақ шарларды ұшыру арқылы, өздері оқып жатқан мектеп түлегіне деген қуаныш сезімдерін білдірді. Ғарышкермен бірге осы мектепке еліміздің жан-жағынан Айдын Айымбетовтың сыныптастары да жиналды. Барлығы мектеп қабырғасында жүрген кездерін еске алды.

Шара соңы Айдын Айымбетовтың кезінде басшылық еткен №21751 әскери бөліміне барып, бөлімнің жеке құрамымен кездесіп, емен-жарқын әңгімелесуімен аяқталды.