Jas.kz

Оңтүстік Қазақстан облысының әкімі Жансейіт Түймебаев «Golden Camel» компаниясының құрылтайшысы Янг Цие мырзаны қабылдады, деп хабарлайды ОҚО әкімінің баспасөз қызметі.

Жыл басында «Golden Camel» ЖШС-нің бастамасымен түйе сүті – шұбатты қайта өңдеуден өткізіп, одан құрғақ қоспалар өндіру жобасына кіріскен болатын.

Кездесуде Янг Цие мырза Түркістандағы индустриалды аймақтан бой көтеріп жатқан осынау жобаның іске асырылуын жеделдетуді облыс әкімінен өтініп, осы күнге дейінгі көрсетілген көмектер мен қолдаулар үшін алғысын білдірді.

Өз кезегінде, аймақ басшысы жобаның өңіріміз үшін маңызды екенін атап өтіп, тиісті сала басшыларына оның әкімшілік кедергілерсіз жүзеге асуына барынша атсалысуды тапсырды.

Бүгінде Түркістандағы индустриалды аймақта шұбатты өңдеп, одан құрғақ сүт өндіретін кәсіпорын құрылысының бірінші кезеңі жүруде. Жоба іске қосылғанда мұнда 180 адам жұмыспен қамтылатын болады. Тәулігіне 100 тонна, жылына 69 млн. тоннадан астам түйе сүтінен құрғақ қоспалар өндіруге қауқарлы зауыттың құрылыс жұмыстары 2017 жылы аяқталып, мұнда әзірленген дайын өнімдер республика нарығынан бөлек, Кеден Одағы елдері мен Қытайға экспортталмақ.

Еске салайық, жалпы құны 8 млрд. теңге болатын аталған жобаны іске қосу туралы меморандум осы жылдың сәуір айында өткен «Ontustik Invest-2016» халықаралық инвестициялық форумы аясында түзілген болатын. Онда осы сынды жалпы сомасы 2,5 млрд. АҚШ доллары болатын жобалар бойынша 40 меморандумға қол қойылған еді.

Оңтүстік Қазақстан облысында ел Тәуелсіздігінің 25 жылдығына арналған «Менің елім – Мәңгілік Ел» республикалық жастар акциясы өтті, деп хабарлайды ОҚО әкімінің баспасөз қызметі.

Қазақстан халқы Ассамблеясы ұйытқы болған шараға облыс әкімі Жансейіт Түймебаев, ҚР Президенті Әкімшілігі Басшысының орынбасары Бағлан Майлыбаев, Қазақстан халқы Ассамблеясы төрағасының орынбасары – хатшылық меңгерушісі Ералы Тоғжанов, ҚХА және аймақтық ассамблея мүшелері, қоғам қайраткерлері, этномәдени бірлестіктер мен зиялы қауым өкілдері, жастар ұйымдарының жетекшілері мен студенттер сынды жалпы саны 5 мыңнан астам азамат қатысты.

Акцияда түрлі өнерлі жастар концерттік бағдарламалар ұсынса, этномәдени бірлестіктердің әншілері Шәмші әндерінен попури орындады. Салтанатты кездесуде сөз алған өңір басшысы, облыстық ҚХА төрағасы Ж.Түймебаев ырысты ынтымақ пен берекелі бірліктің бастауы болған Қазақстанның Тәуелсіздік жылдарында жеткен жетістіктеріне шолу жасап, бірқатар салалардағы жұмыстарға тоқталды.

«Тәуелсіздік жылдарында облыстың экономикалық әлеуеті көтеріліп, халық саны 1 миллион тұрғынға көбейді. Өнім көлемі 90 жылдардағы 40 млрд. теңгеден, 2015 жылы 2,5 трлн. теңгеге артты. Өңір экономикасына тартылған инвестиция көлемі 3,3 трлн. теңгеге жетті. Білім беру саласында 491 жаңа мектеп, 1491 мектепке дейінгі ұйым, 347 денсаулық сақтау нысаны пайдалануға берілді. 9 млн. шаршы метр тұрғын үй пайдалануға беріліп, 100 мыңнан астам отбасы баспаналы болды», — деді Ж.Түймебаев.

Акция барысында «Мәңгілік ел жастарының жетістіктері – Қазақстан Респуликасы Тәуелсіздігінің 25 жылдығына» — «Достижения молодежи «Мәңгілік Ел» к 25-летию Независимости Республики Казахстан» кітабы салтанатты түрде облыс жастарына тапсырылды. Кітапта Тәуелсіздік жылдары жастардың қол жеткізген жетістіктері, өңірлерде оларға жасалған қамқорлықтар, сонымен қатар, «Мәңгілік Ел» Патриоттық идеясының біріктіруші рөлін және өңірлердегі жастардың ел Президенті – Ұлт көшбасшысына қолдауын көрсететін үндеулері жазылған.

Үндеуде республика жастары Елбасы басшылығымен қол жеткізілген жетістіктер, оның шешуші факторы — бейбітшілік пен келісім болғанын жазып, Президенттің бастамаларын қашан да қолдауға дайын екендіктерін білдіреді.

Айта кету керек, осы жылдын 4 қарашасында Талдықорғаннан бастау алған «Менің елім – Мәңгілік Ел» республикалық жастар акциясы Алматыдан соң, үшінші болып, біздің облысымызда ұйымдастырылуда.Үш милионға жуық тұрғыны бар Оңтүстік Қазақстан облысы тұрғындарының 30 пайызын жастар құрайтын болғандықтан аталған шара жоғарғы денгейде өтті. «Менің елім – Мәңгілік Ел» республикалық жастар акциясы келесі кезекте Жамбыл облысында өтетіндіктен Қазақстан Респуликасы Тәуелсіздігінің 25 жылдығына» — «Достижения молодежи «Мәңгілік Ел» к 25-летию Независимости Республики Казахстан» кітабын еліміздің мақтанышы олимпиада жүлдегері Жазира Жаппарқұл мен Назарбаев зияткерлік мектебінің белсенді оқушысы Берікболсын Сүлейменов  салтанатты түрде табыс етті. Еліміздің барлық аймақтарында өтетін акция 28 қарашада Астанада қорытындыланып, мәресіне жетпек.

Еске салайық, Оңтүстік Қазақстан облысында 100-ден астам этнос өкілдері өмір сүреді. Облыс бойынша 20 этномәдени бірлестік, ал қалалар мен аудан орталықтарында олардың 51 филиалы қалыпты қызмет көрсетіп келеді. Этномәдени бірлестіктер жанында 11 жексенбілік мектептер, ақсақалдар кеңестері мен жастар қанаттары жұмыс істейді.

Осы жылдың 1 қарашасынан бастап ОҚО ІІД Жергілікті полиция қызметінің өкілдері  Оңтүстік Қазақстан облысының аумағында «Браконьер» жедел алдын алу іс-шарасын жүргізуде, деп хабарлайды ОҚО ІІД ЖПҚ баспасөз қызметі. Шараның басты мақсаты – табиғатты қорғау заңнамасын бұзушылардың жолын кесу болып табылады. Рейд жұмыстарына полиция қызметкерлері мен табиғатты қорғау өкілдерінен құралған 50-ден астам жедел топ жұмылдырылды.

Өткен үш тәулік ішінде тәртіп сақшылары табиғатты қорғау заңнамасын бұзған 54 құқықбұзушылықты және 9 экологиялық қылмысты анықтады. Атап айтқанда, ағаштарды кесу, жануарлар дүниесін пайдалану және аң аулау талаптарын бұзу, балық аулау, күтіп ұстау қағидаларын және жасыл желектерді бұзу ең көп тараған құқықбұзушылықтар болып табылуда.

Мәселен, 1 қараша күні полицейлер Сарыағаш ауданы аумағындағы Келес өзенінің бойында ағаштарды заңсыз кескен 1988 жылы туылған жергілікті тұрғынды ұстап, айғақ зат ретінде балта және 0,5 куб кесілген ағаш тәркіледі. Сонымен бірге, осы күнгі іс-шаралар кезінде Түркістан қаласында полицейлер сексеуіл артқан жүк көлігін анықтады. 1982 жылы туылған Түркістан қаласының тұрғынында ешбір құжат болмаған. Жүргізуші мен оның жанындағы 1991  жылы туылған Отырар ауданының тұрғыны автокөлікпен бірге оқиғаның мән-жайын анықтау мақсатында Түркістан ҚІІБ-ге жеткізілді.

Аталған жайттар бойынша ҚР ҚК-нің 340-бабымен «Ағаштар мен бұталарды заңсыз кесу, жою немесе зақымдау» қылмыстық іс қозғалды. Сотқа дейінгі тергеу жүргізілуде.

Сонымен қатар, табиғатты қорғау заңнамасын бұзған 45 құқықбұзушыға әкімшілік тәртіппен 130 мың теңгеден астам айыппұл салынды.

Табиғатты қорғауға бағытталған аталған іс-шара 10 қарашаға дейін жалғасатын болады.