Jas.kz

Бүгін Талдықорған қаласындағы Достық үйінде Алматы облысының әкімі, облыстық Ассамблеяның төрағасы Амандық Баталовтың төрағалығымен «Мемлекеттік этносаясаттың басты мақсаты – болашағы біртұтас ұлтты қалыптастыру» атты тақырыппен облыстық Қазақстан халқы Ассамблеясының XXII сессиясы өтті.

Жиында баяндама жасаған облыстық ҚХА хатшылығының меңгерушісі Ғабит Тұрсынбайдың айтуынша, облыста 200-ден астам қоғамдық келісім кеңестері жұмыс істейді. Жыл басынан бері олар әр түрлі әлеуметтік мәселелерді шешу мақсатында 400-ден астам мәжіліс өткізген. Сондай-ақ түрлі қайырымдылық шараларының шеңберінде 20 млн. теңгеден астам сомаға көмек көрсетілді. Баяндамашы биылғы жылы Қазақстан Тәуелсіздігінің 25 жылдығына орай бірқатар шаралар белгіленіп отырғанын да тілге тиек етті. Бұл жұмыс жыл басынан бері жалғасып келеді.

Облыстық Ассамблеяның жергілікті жерлерде, аудан, қалаларда жүргізген жұмыстары туралы Іле аудандық күрд этномәдени бірлестігінің төрағасы С. Чатуев, балкар этномәдени бірлестігінің белсендісі Ф. Хаджиева, аудандық «Алакөл» газетінің тілшісі В. Иванова, Панфилов аудандық «Шатлык» ән-би ансамблінің жетекшісі, С. Аметов, «Видергебурт» талдықорғандық немістер қоғамы төрағасының орынбасары Е. Молодцов, Қаратал ауданы Бастөбе селолық округі әкімдігінің бас маманы И. Цой, әзірбайжан мәдени орталығының белсендісі Б. Бахшиева сөз сөйледі. Олардың барлығы да достық, келісім мен бірлік – мемлекеттің бақуаттылығы мен дамуының кепілі, көпұлттылық байлығымыз бен құндылығымыз екенін атап өтті.

Облыс әкімі Амандық Баталов жиынды қорытындылау барысында облыстың әлеуметтік-экономикалық даму нәтижелеріне тоқталып, қол жеткізген табыстар еліміздің тұрақтылығының арқасында екенін айтты.

— «Мәңгілік Ел» құндылықтары саналатын бірлік, бейбітшілік, келісім ұғымдарының мәнін әрбір отбасына, әрбір үйге жеткізу үшін этномәдени бірлестіктердің әлеуетін кеңінен пайдалануымыз керек. Барлық қайырымдылық шараларын Ассамблея арқылы үйлестіріп, әрбір елді мекенде жұмыстың әлеуметтік бағытын күшейтуіміз керек. Сонымен қатар Қоғамдық келісім кеңестерінің рөлін нығайту шараларын қабылдау қажет. Бұл жұмыстар немқұрайлы сипатта болмауы керек, — деді Алматының облысының басшысы қорытынды сөзінде.

Осы жиында бірқатар қоғам қайраткерлері Қазақстан халқы Ассамблеясының «Бірлік» қоғамдық алтын медалімен, Қазақстан Республикасы Президентінің Алғыс хатымен, Қазақстан халқы Ассамблеясының және Алматы облысы әкімінің алғыс хаттарымен марапатталды.

Сессия соңында Алматы облыстық Қазақстан халқы Ассамблеясының XXII сессиясының шешімі бірауыздан қабылданды.

Жиын соңында этномәдени бірлестіктер дайындаған концерт ұсынылды.

Астананың туған күнінде Қазақстан Республикасының 25 жылдығына арналған «Бағаналы ордам — басты ордам» ақындар айтысы өтеді. Еліміздің ең мықты суырып салма ақындары өзара сынға түседі, деп хабарлайды қалалық әкімдіктің баспасөз қызметі.

Қазіргі таңда дүкен сөрелеріндегі сан-алуан тағамдардың бірқатары химиялық қоспаларға толы. Оларда адам ағзасына пайдасы мол табиғи дәрумендер жоқтың қасы. Мысалы, көп мөлшердегі қант, газдалған сусын, шарап секілді күнделікті тұтынатын тауарлар тістің бірден-бір жауы.

Дегенмен, тістің беріктігі мен тазалығына оң әсерін тигізетін азық-түліктер де аз емес. Біз сіздерге сондай тағамдардың 10 түрін ұсынамыз.

1. Көк шай – құрамында полифенол және табиғи антиоксидантары быр көк шай тіс қабыршақтануынан қорғап, тіс жегінің алдын алады. Фторға бай көк шай тіс эмалін де қорғайды. Сондай-ақ, бұл шай түрі ауыз қуысын жағымсыз иістен арылтады.
2. Сүт пен йогурт – бұл тағамдардың құрамында қант аз болғандықтан, тіс жегі қаупінен сақтайды, тіс беріктіне ықпалын тигізеді.
3. Ірімшік – кальций мен фосфатқа толы ірімшік бактерияларды өлтіріп, тіс эмалін сақтайды.
4. Жеміс-жидек – алма, құлпынай, апельсин, лимон, киви секілді жеміс түрлері С витаминіне бай келеді. Олар қызыл иектің зақымдауынан қорғап, пародонтоздың алдын алады.
5. Көкөніс – асқабақ, сәбіз, картоп, брокколи эмаль мен қызыл иектің саулығына әсер етеді.
6. Пияз – пісірілмеген, яғни шикі пияз антибактериалды қасиетке ие. Өз рационында пиязды жиі қолдансаңыз, тістеріңіз берік әрі ерекше таза болады.
7. Сельдерей – сельдерейден бөлінетін сөл қызыл иекке ерекше пайдалы. Бактериялардан қорғайтын бұл тағам тістің тазалығына да пайдасы мол.
8. Кунжут дәндері – тіс қабыршатануын алдын алады, эмальдің сақталуына көмегін тигізеді.
9. Ет пен жұмыртқа – кальций, витамин D және фосфор тістің мықты әрі дұрыс өсуіне әсер етеді.
10. Су – тіс зақымдануынан қарапайым су да қорғайды. Күнделікті дұрыс мөлшерде ішкен су ауыз қуысын тазартып, тамақ қалдықтарын болдырмайды.

Тістің саулығы тек тамақтанудың ғана емес, сондай-ақ, дұрыс күтімнің арқасында жүзеге асады. Тіс пастасы мен щеткасынан басқа, тіс жібі мен арнайы сұйықтықтарды қолданған абзал. Тіс жібі тамақ қалдықтарынан айрылтса, ауыз шайқауға арналған сұйықтық тіс жегінен сақтап, жағымсыз иістен қорғайды. Ауыз қуысы тазалығында тіл тазалығы да ерекше орын алады. Оны арнайы қасықпен немесе щеткамен тазалауға болады.

Уақытылы өткізілетін ауыз қуысы тазалығы мен дұрыс тамақтану ережесі тісіңіздің сақтығына оң әсерін тигізеді.

el.kz

Алматыда Есентай өзенінің Жетісу ауданындағы және Қарасу өзенінің Түркісіб ауданындағы учаскелері мен су қорғау жолақтарында құрылыс-монтаж жұмыстары басталды.

Алматы қаласы табиғи ресурстар және табиғатты пайдалануды реттеу басқармасы су объектілерін және жер қойнауын пайдалануды реттеу бөлімінің басшысы Айдын Темешевтің айтуынша, бұл екі учаскеде 66 тұрғын үй мен 48 азық-түлік базасын су басу қаупі бар.

Есентай өзенінің Райымбек даңғылы мен Ангарский көшесі аралығындағы учаскесі қайта жаңғыртылады. Ұзындығы — 4,5 шақырым. Бұл учаскеде өзеннің табаны тереңдетіліп, жағасы темірбетонмен және габионды құрылымдармен нығайтылады.

Жергілікті бюджеттен бұл мақсатқа — 640 млн. жуық теңге бөлінді. Мердігерлік ұйым — «Спецстрой Компаниясы» ЖШС. Қайта жаңғырту жұмыстары қазір басталып та кетті. Ол биылғы жылдың желтоқсан айына дейін жалғасады.

«Райымбек даңғылынан Рысқұлов даңғылы аралығында негізінен жеке тұрғын үйлер, зират, өндірістік базалар орналасқан. Ал Рысқұлов даңғылы мен Маркелов көшесі аралығында тұрғын үйлер өзен арнасына өте жақын орналасқан. Оның үстіне бұл аумақта қоймалар, базарлар бар. Яғни, өте қауіпті участок. 450 жеке тұрғын үй бар. Сел бола қалса, бұл үйдерді су басуы мүмкін. Біз қазір

Алматы қаласы мемлекеттік сәулет-құрылыс бақылауы басқармасының тиісті рұқсатын алдық. Енді өзен арнасында өсіп тұрған, құрылысқа кедергі келтіретін 170 ағаштар алынып тасталады», — деді ол.

Ал Қарасу өзеніндегі қайта жаңғырту жұмыстары  Ипподром мен Ержанов көшесі аралығындағы учаскесінде жүргізіледі. Ұзындығы — 4,2 шақырым. Жоспар бойынша өзеннің табаны тереңдетіліп, жағасы нығайтылады. Жергілікті бюджеттен бұл жұмыстарға — 540 млн. теңге бөлінді. Жұмыс алдағы желтоқсан айында аяқталады.

«Жөндеу жұмыстары барысында коммуникация желісі өшірілмейді. Есентай өзені бойынша желілердің орны ауыстырылады. Бірақ, бұл жөнінде меншік иелерімен алдын ала келісіп алынады», — деді А. Темешев.

ҚазАқпарат 

Алакөл жағалауындағы инфрақұрылымды дамыту туризм саласын дамытудағы басым бағыттардың бірі. Қазіргі уақытта жаңа қонақ үй, демалыс аймақтары мен нысандарының құрылысына қатысты жұмыстар басталды. Өз кезегінде туристерді Алакөл жағалауына қауіпсіз және жайлы жағдайда жеткізу үшін Үшарал аэродромына тұрақты ұшуларды қалпына келтірудің қажеттігі туды, деп хабарлайды ҚР Инвестициялар және даму министрлігінің Азаматтық авиация комитеті

Қазіргі уақытта Үшарал қаласының әскери аэродромын  азаматтық авиация үшін бірлесе пайдалануды қарастыратын ҚР ИДМ мен ҚР Қорғаныс министрлігінің «Аэродромдарды бірлесе игеру және бірлесе орналасатын аэродромдардың тізімін бекіту жөніндегі» бірлескен бұйрығына өзгерістер енгізілді.

Сонымен бірге Алматы облысының әкімдігі Үшарал әуежайы аэровокзалы ғимараты құрылысының жобалық-сметалық құжаттарын әзірлеу аяқталды және құрылыс-монтаждау жұмыстарын жақын күндері бастау көзделіп отыр. Сондай-ақ, ұшып-қону алаңына жөндеу жұмыстарын жүргізу туралы және әуе қозғалысын ұйымдастыру үшін қажетті радиотехникалық және метеорологиялық құрал-жабдықтар орнатуға қатысты мәселелер шешілуде.